Arctic Monkeys хамтлаг таван жилийн дараа анх удаа шинэ цомгоо танилцуулна

Их Британийн алдарт Arctic Monkeys хамтлаг таван жилийн дараа анх удаа шинэ цомгоо худалдаанд гаргах гэж буйгаа мэдэгдлээ. "Tranquility Base Hotel & Casino" нэртэй энэхүү цомог нь 2018 оны тавдугаар сарын 11-нд худалдаанд гарахаар болсон байна. Уг бүтээл нь Arctic Monkeys хамтлагийн зургаа дах цомог болох юм. Тэд хамгийн сүүлд 2013 онд "AM" нэртэй тав дах цомгоо танилцуулж байсан билээ.

Хамтлагийн шүтэн бишрэгчид яг одоо "Tranquility Base Hotel & Casino" цомгийг iTunes, Amazon, Spotify тавцангуудаас урьдчилж захиалах боломжтой. Түүнчлэн Arctic Monkeys хамтлагийн албан ёсны вебсайтаас энэхүү цомгийг компакт диск (CD) эсвэл мөнгөлөг өнгөтэй пянз хувилбараар захиалж авч болно.