Пандора: Аватар киноны ертөнцөөр сэдэвлэсэн парк нээгдэнэ

Флорида мужийн Орландо хотод байрлах Disney World-д энэ зун  найруулагч Жеймс Камероны "Avatar" киноноос сэдэвлэсэн "Pandora: The World of Avatar" парк нээгдэх гэж байна. Энэхүү сэдэвчилсэн паркийн барилгын ажил 2014 онд эхэлсэн бөгөөд Жеймс Камерон өөрийн бүтээлээ бодит амьдрал дээр бий болгохын тулд Disney компанитай маш ойр ажиллажээ. Тодруулбал Walt Disney Imagineering ба Жеймс Камероны Lightstorm Entertainment компаниуд хамтарч "Pandora: The World of Avatar" цэнгэлдэх хүрээлэнгийн дизайныг гаргасан гэдгийг Business Insider мэдээллэж байна.

Энэхүү сэдэвчилсэн паркийн ургамал, байгаль, амьтад гээд бүх зүйлс нь яг л "Avatar" кинонд гардагтай ижил байх бөгөөд зочид нисч, завиар зугаалж болно. Мөн цэнгэлдэх хүрээлэнд зочдод зориулсан хэд, хэдэн ресторан ба дэлгүүрүүд байрлах юм байна.