Playtime амьд хөгжмийн наадам 2016: Streetstyle. Нэгдүгээр хэсэг
Мартагдашгүй мэдрэмж
"Энэ жилийн Playtime наадам хамгийн гоё болж байна" гэх үгс хаа сайгүй сонсогдоно. The Radio Dept. тэргүүтэй гадаад хамтлаг дуучдаас эхлээд монголын амьд хөгжмийн хамгийн супер хамтлагууд энд цугларчээ. Шилдэг сайн хөгжимчдөөс гадна мөн загвар зохион бүтээгчид, загвар өмсөгчид, DJ нар, зураачид гээд олон төрлийн сонирхолтой хүмүүс харагдана.
Хэрэв Playtime наадмыг дээрээс харвал бүхэлдээ хиппи, богем, рок өнгө аястай хувцасласан бүтээлч залуусын бөөгнөрөл үзэгдэх болно. Хүмүүс энд амьд хөгжим сонсож, зуны амтыг мэдрэхээс гадна агаарт делта планаар хөөрч, усанд шумбаж, монгол загвар зохион бүтээгчдийн хувцаснаас худалдан авч, хена хээ бүхий нүүр будалт хийлгэж цагийг үнэхээр сайхан өнгөрөөж байна.
Playtime наадмын эхний өдөр үзэгчдийг The Lemons хамтлаг хамгийн их доргиосон бол одоо The Colors, The Rec On, The Radio Dept. хамтлагууд өөрсдийн тэсрэлтээ хийнэ. Эхний хоёр өдөр алтернатив, инди уур амьсгалаар бялхаж байгаа Playtime наадам маргааш илүү рок, метал шуургаа тавих болно. Жинхэнэ рок, цахилгаан хөгжмийн ид шид юундаа байдгийг Аясан салхи, Нисванис тэргүүтэй акулууд үзүүлнэ.
Мөн энэ жил наадам зөвхөн амьд хөгжмийн хамтлаг дуучдаас гадна электро, техно хөгжим тоглуулдаг 21 DJ-гийн сет тоглолттой болж байгаа тул энд ямар ч төрлийн хүмүүс уйдахгүй, зөвхөн аз жаргал, чөлөөт байдлыг мэдэрч байна.
