Z үеийнхэн загварын урам зориг авч, хувцаслалтаас нь үлгэрлэн төрхөө бүрдүүлэх тал дээрээ Жижи Хадид, Белла Хадид, Женнер эгч дүүс, Зендея, Билли Айлиш, Кайа Гербер гэх алдартнуудыг нэн түрүүнд онцолдог. Мөн мэдээж Бейонсе, Рианна нар Z үед хамрагддаггүй ч өсвөр үеийнхний харж, үлгэрлэх дуртай оддын топ тавд ордог талаар 2020 онд Laybuy стартап компани өөрийн хийсэн судалгаан дээр үндэслэн мэдээллэж байсан. Тэгвэл бидний сайн мэдэх эдгээр хүмүүсээс гадна Z үеийнхэнд мөн шинэ нүүр царайнууд нөлөөлж эхэлжээ.
Оливия Родриго нь анхны бүтээл болох Drivers License дуугаараа үнэнч шүтэн бишрэгчдийнхээ багийг бүрдүүлээд авсан. Энэхүү уран бүтээл нь АНУ, Их Британийн Billboard Hot 100 болон Billboard Global 200 чартуудад тэргүүлсэн юм. Түүнчлэн Оливия 18 насандаа Saturday Night Live шоунд оролцож, Sour цомгоо амжилттай гаргаад зогсохгүй цахим ертөнцөд дараагийн Билли Айлиш хэмээх нэрийг хүртээд байгаа билээ.
Уран бүтээлч маань олон хүний сонорыг мялаасан гайхалтай дуунуудыг хийснээс гадна загварлаг хувцаслах тал дээр дутахааргүй гоо зүйн мэдрэмжтэй гэдгээ тоглолтын хувцаслалт, street style төрхүүдээрээ батлан харуулдаг юм. Тэрээр 2000-аад оны хэв маягийн янз бүрийн хээтэй загвар, кроп топ, винтэж богино футболка, Erika Maish брэндийн ноосон эдлэлүүдээр төрхөө бүрдүүлэх дуртай. Мөн Оливия яг л өнгөлөг барби шиг хувцаслалтаас эхлэн sexy, глэм төрхүүдийг улаан хивсний ёслолууддаа бүрдүүлдэг бөгөөд эдгээрийг бүтээлцэхэд түүнд стилист Анна Хьюз-Чемберлен тусалдаг байна.
Өсвөр үеийнхний загварын үлгэр дууриалал авдаг гол эх сурвалжуудын нэг бол TikTok платформ билээ. Тэгвэл энэхүү олон нийтийн сүлжээнд бүжгийн бичлэгүүдээрээ 150 гаруй сая хүнийг татаж чадсан нь Чарли Дамелио юм. Тэрээр 17 насандаа TikTok-ийн тусламжтай өөрийн карьерийг эхлүүлсэн бөгөөд сүүлд хийсэн ажлуудаас нь дурдваас өөрийн эгч Дикси Дамелио болон ээж, аавынхаа хамтаар гэр бүлийнхээ өдөр тутмын амьдралыг харуулсан реалити шоугаа цацаж эхэлсэн билээ.
Чарли сул жийнс, hoodie, энгийн кроп топ, converse кетэндээ үнэнч байдаг ч сүүлийн үед ретро болон 2000-аад оны загварын чиг хандлагыг баримталж байгаа юм.
Мэдисон Бир нь 2012 оноос буюу 13 наснаасаа эхлэн алдартай дуунуудын cover-ыг хийж, YouTube хуудсандаа нийтэлдэг байсан. Улмаар түүний бүтээлүүдэд дуучин Жастин Бибер анхаарлаа хандуулан Twitter хуудсандаа хуваалцсанаар Мэдисоны нэр дэлхийд танигдаж эхэлсэн билээ. Энэхүү үйл явдлаас жилийн дараа л гэхэд тэрээр анхны уран бүтээлээ гаргасан байдаг. Одоо Мэдисон Epic Records-той гэрээ байгуулсан бөгөөд энэ арваннэгдүгээр сард АНУ-аар аялан тоглолтоо хийх юм.
Мэдисон Бирийн jogger өмд, дугуйчны шоорт, hoodie-г хослуулсан өдөр тутмын street style зураг цахим орчинд хамгийн алдартай нь. Түүнчлэн тэрээр улаан хивсний ёслолуудад биеийн галбираа тодотгосон даашинзуудаар гоёх дуртай.
“Grown-ish” цувралын од Яра Шахиди улаан хивсний ёслолын гоёлоо бэлдэхдээ нарийн, жижиг деталь бүртээ анхаардаг онцлогтой. Тэдгээр гоёлуудаас Ярагийн энэ жилийн Грэмми шагнал гардуулах ёслолд өмссөн Dior загварын ордны Холливуудийн алтан үеийн загвараас сэдэвлэн урласан винтэж загварын даашинзыг эргэн санаарай. Шахиди төрхөө бүрдүүлэхдээ зөвхөн хувцсандаа анхаараад зогсохгүй өвөрмөц үс засалт, зоримог мейкап хийдэг билээ. Уран бүтээлч маань Аманда Горман, Жанет Мок, Ава Дюверней нарын хувийн стилистээр ажилладаг Жейсон Болдентэй хамтран ажилладаг байна.
Сошиал медиа дахь нөлөө бүхий эрхмүүдийн нэг бол яахын аргагүй Эддисон Рэй билээ. Түүний TikTok 85 гаруй сая дагагчтай бол Instagram хуудас нь 40,1 сая дагагчтай юм. Үүнээс гадна, Эддисон дуу, хөгжим, кино, үйлдвэрийн салбарт хүч үзэж байгаа. Тухайлбал, тэрээр Obsessed нэртэй дуугаа гаргаж, Netflix-ийн шоугаа хийж, Reebok, Hollister, L'Oreal болон бусад дэлхийн брэндүүдтэй хамтран TikTok-ийн хамгийн өндөр орлоготой эрхмээр тодорсон билээ.
Түүний хувцасны шүүгээг бүрдүүлэхэд Сиена Монтесано гэх стилист гар бие оролцдог юм. Сиена өмнө нь Деми Ловато, The Chainsmokers нартай хамтарч байсан туршлагатай билээ. Харин MTV Movie & TV Awards 2021 шагнал гардуулах ёслолын төрхийг энэ жилийн хамгийн загварлаг эрхмээр тодорсон Зендеягийн стилист Лоу Роуч бүрдүүлжээ.
Рики Томпсон бол өсвөр үеийнхний загварын үлгэр дууриалал авдаг гол эрхмүүдийн нэг билээ. Тэрээр анх хөгжөөнт бичлэгүүдээ Vine олон нийтийн сүлжээнд нийтэлж, Youtube-дээ бэлгийн чиг хандлагын ялгаварлан гадуурхалтай тулгардаг түүхээсээ болон загварын бичлэгүүдээсээ хуваалцдаг байсан. Улмаар түүнийг 17 настай байхад Кайли Женнер бичлэгээс нь хуваалцаж, түүний сошиал медиад эзлэх байр суурийн үндэс тавигдсан юм. Харин одоо Рики аль хэдийн “Foursome” YouTube цувралын ард гарч, дуучин Aminé-ийн Reel It In дууны клипэнд тоглож, Teen Vogue сэтгүүлийн хуудсыг чимж, Coach ордны “We C You” төсөлд оролцож, Alexаnder Wang загварын ордны загварын шоунд алхсан амжилтуудыг гаргасан байна.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт