Бюро 24/7 ба Farfetch-ийн үдэшлэг: Нэгдүгээр хэсэг

Бюро 24/7 дижитал сэтгүүл залуу дизайнеруудыг нээж, дэмжих зорилготой Buro Fashion Forward Initiative төслөө гурван жилийн өмнө анх санаачилсан билээ. Энэ жилийн BFFI төслийг Бюро 24/7 онлайн худалдааны Farfetch дэлгүүртэй хамтран Парис хотноо есдүгээр сарын 30-нд зохион байгууллаа

Бюро 24/7-гийн үүсгэн байгуулагч Мирослава Дума залуу дизайнеруудыг нээн илрүүлж, тэднийг дэлхийн шилдэг брэндүүд болон загварын салбарын нөлөө бүхий хүмүүстэй холбож өгөх зорилгоор анх "Buro Fashion Forward Initiative" төслийг санаачилсан билээ. Энэ жилийн BFFI төсөл маш өргөн хүрээнд зохион байгуулагдаж Карин Ройтфельд, Наташа Поли, Ирина Шейк ба Саша Лусс нар хамтарч BFFI төсөлд оролцогсдод зориулсан хүлээн авалтыг Парис хотод зохион байгууллаа. 

Парисын домогт The Ritz Paris зочид буудал томоохон хэмжээний шинэчлэлт хийгдсэний дараахан Vendôme зааланд нь BFFI-ийн үдэшлэг болсон юм. Энэхүү түүхэн зочид буудалд өмнө нь Коко Шанель, Марсель Пруст, Фрэнсис Скотт Фицжеральд болон бусад алдартай зохиолчид, зураачид амьдарч байжээ.

The Ritz Paris зочид буудалд BFFI төсөлд оролцсон дизайнерууд өөрсдийн үндсэн цуглуулгаа олон улсын загварын мэргэжилтнүүдийн өмнө танилцуулсан юм. Эдгээр дизайнеруудын дунд өөрийн Vilshenko брэндэд хээ ба хатгамал зэрэг орос элемент ашигладгаараа алдартай Ольга Вильшенко багтсан байна. Мөн street style одуудын хайртай дизайнер болох Тигран Аветисян ч оржээ. Тэрээр LVHM группын тэтгэлгийн эзэн болж, Acne ба Lanvin брэндүүдэд дадлагжиж байсан туршлагатай.

Минималист болон романтик уур амьсгалтай загварыг нэг дор цогцлоож чаддаг Юлия Калманович болон уламжлалт эмэгтэйлэг байдлыг дэлгэрүүлдэг дизайнер Александр Терехов нар мөн BFFI-д оролцсон байгаа. Түүнчлэн SHOWstudio тэмцээний ялагчид болох Outlaw Moscow брэндийн дизайнерууд мөн нарийн эсгүүрийг өдөр тутмын хувцсанд суулгаж өгдөг гүрж дизайнер Гола Дамиан ба Жаба Диасамидзе нар цуглуулгаа танилцууллаа.

Энэ жилийн арга хэмжээнд олон улсын онлайн худалдааны Farfetch хамтарснаар дээрх дизайнеруудад илүү том боломж гарсан гэж хэлж болно. 

Бюро 24/7 ба Farfetch-ийн зохион байгуулсан арга хэмжээнд Ким ба Кортни Кардашьян, Наталья Водянова, Жоанна Баталья, Анна Дел Руссо, Кортни Лав, Фрэнсис Бин Кобейн, Ясмин Ле Бон, Имрад Амед, Ася Мхитарян, Меруерт Ибрагим, Мирела Форич, Беттина фон Шлиппе болон бусад алдартай зочид хүрэлцэн ирж, ирээдүйтэй залуу дизайнеруудын цуглуулгыг сонирхсон байна.