Оскар 2022: Улаан хивсний шилдэг төрхүүд

94 дэх удаагийн Оскарын наадам ёслол төгөлдөр эхэллээ. Энэ өдөр Холливүүдийн А зэрэглэлийн уран бүтээлчид Лос Анжелес хотын Долби театрт хуран цугларч кино ба телевизийн шилдгүүд тодрох торгон мөчийг гэрчилдэг билээ. Мөн тэд театрын босгыг давахаас өмнө үдшийн гоёлоо харуулан улаан хивсээр алхдаг уламжлалтай. Энэ жилийн улаан хивсний ёслол дээр маш олон төрлийн өнгө, силуэт, деталиудтай даашинз болон хослолууд зонхилжээ. Тэдгээрээс Мэгги Жилленхол кутюр цуглуулгаараа шилдгүүдийн эгнээнд багтдаг Schiaparelli загварын ордны алтлаг чимэглэлтэй хар даашинзаар гоёсон бол 2021 оны хамгийн загварлаг хүнээр тодорсон жүжигчин Зендея Valentino-ийн саатай макси юбка, атласан цагаан топыг сонгож, харин Оскарын хэд хэдэн төрлүүдэд нэр дэвшсэн “Dune” киноны гол дүр Тимоти Шаламе Louis Vuitton загварын ордны саатай, хар өнгийн хослолоор төрхөө бүрдүүлсэн байв. Түүнчлэн улаан хивсэн дээр улаан болон нил ягаан өнгийн төрхүүд хэд хэд харагдлаа. Тодруулбал, Кирстен Данст, Трейси Эллис нар Lily et Cie, Carolina Herrera брэндийн улаан даашинзаар тус тус гоёж, харин Деми Синглтон, Жессика Честейн нар Пантон институтээс 2022 оны гол өнгөөр нэрлэсэн нил ягаан өнгийг сонгожээ.

Энэ жилийн шагнал гардуулах ёслолыг Режина Холл, Эми Шумер, Ванда Сайкес нар хөтлөн явуулж байгаа бол хамгийн олон төрөлд нэр дэвшсэн бүтээлээр “The Power of the Dog”, “West Side Story”, “Licorice Pizza” кинонууд тодроод байгаа юм. Бид тун удахгүй наадмын ялагчдын нэрсийг мэдээллэх болно.