Apple-ын анхны компьютер асар өндөр үнээр худалдаалагдлаа

Christie's дуудлага худалдааны компани Apple-ын бүтээсэн анхны компьютерыг 355,000 доллараар худалдлаа.

Apple-1 нэртэй уг компьютерыг тус компанийн үүсгэн байгуулагчид болох Стив Жобс ба Стив Возняк нар өөрсдийн гараар зохион бүтээж, угсарчээ. Урьдчилан угсарсан эх хавтантай энэхүү компьютер нь анх 1976 онд 666,66 доллараар худалдаанд гарч байсан түүхтэй. Стив Возняк давтагдсан тоонд дуртай байсан учраас энэхүү үнийг гаргаж байжээ.

Apple-1 компьютерыг худалдан авахад тэжээлийн эх үүсвэр, товчлуур, эх бие ба дэлгэц дагалдаж ирдэггүй байсан бөгөөд хэрэглэгч эдгээр зүйлсийг өөрөө нэмж авах шаардлагатай байсан юм. Тухайн үед нийт 200 ширхэг Apple-1 компьютер үйлдвэрлэгдсэн ч 63 ширхэг нь л хадгалагдаж үлдсэн байна. Гэхдээ одоогоор эдгээр компьютеруудаас ердөө зургаа нь л ажиллаж байгаа аж.