Нэвт гэрэлтэх юбка, цагаан майк, цацган чимэглэл Prada брэндийн цуглуулгад

Загварын ордны бүтээлч захирлууд болох Миучча Прада, Раф Симонс нарын намар-өвөл 2022 цуглуулгад өдөр тутамдаа өмсөхөд тохиромжтой энгийн атлаа хаанаас нь ч харсан Prada брэндийнх гэж танигдахаар онцлог детальтай загварууд багтжээ. Тодруулбал, Prada-гийн нэрийн хуудас болсон гурвалжин логотой цагаан майк, нямбай эсгүүртэй хослол, ноосон загварууд цуглуулгын минимал өнгө аясыг тодорхойлж байсан бол цэцгэн чимэглэл, цацаг, торон оруулгатай бомбер хүрэм, пальто болон юбка нь цуглуулгын онцлог байдлыг илэрхийлж байв. Түүнчлэн дизайнерууд гадуур хувцас, тейлор хослол геометрийн хээтэй цамцыг өнгөрсөн нэгдүгээр сард танилцуулсан эрэгтэй цуглуулгаасаа сэдэл аван, төстэй силуэтээр урлаж загварын хүйсгүй хэв маягийг харуулахыг зорьжээ. Үүнээс гадна бүтээлч захирлууд нэвт гэрэлтэх юбкаг сул пиджак, үслэг хүрэмтэй хослуулж, энгийн цагаан майкийг торон даашинзтай загварчлах маягаар өндөр контрасттай стилистик аргачлалыг хэрэгжүүлсэн байна.

Загварын шоуны бас нэгэн анхаарал татсан зүйл бол моделиудын бүрэлдэхүүн байсан бөгөөд шоуг нээж Кайа Гербер, харин сүүлийн төрхийг “Euphoria” цувралын жүжигчин Хантер Шафер харуулсан юм. Мөн Кендалл Женнер, Мика Арганараз, Кристи Пономарь зэрэг салбарын шилдгүүд Prada-гийн тайзнаа алхсан юм.