Парисын загварын долоо хоног дээрх шилдэг street style төрхүүд
Загварын долоо хоногийн хамгийн сүүлийн зогсоол Парис хотноо ирлээ. Хуваарийн дагуу тус аргаа хэмжээ нь аравдугаар сарын 1-ний өдөр хүртэл үргэлжлэх ба энэ үеэр Dior, Saint Laurent, Balenciaga, Miu Miu, Louis Vuitton, Loewe тэргүүтэй томоохон загварын орднууд хавар-зун 2025 улиралд зориулсан шинэ цуглуулгaa танилцуулах болно. Тэр дундаас алдарт загвар зохион бүтээгч Алессандро Микелегийн Valentino брэндийн бүтээлч захирал болсноос хойших анхны цуглуулга, Disneyland Paris цэнгэлдэх хүрээлэнд зохиогдох Coperni ордны загварын шоу олон нийтийн дунд багагүй хүлээлт үүсгээд байгаа юм.
Түүнчлэн загварын долоо хоногийн бас нэгэн онцлох хэсэг бол шоунд хүрэлцэн ирсэн зочдын төрхүүд байдаг билээ. Энэ жилийн хувьд Dior ордны шоунд уригдсан BLACKPINK хамтлагийн Жисүгийн хар өнгөөр дагнасан монохром дүр төрх, жүжигчин Натали Портманы өмссөн хөвсгөр хормойтой шигтгээгээр бүрхсэн юбка, мөн Saint Laurent ордны нүүр царай Rosé-ийн гоёсон шаргал өнгийн хиймэл үсэн хүрэм болон өнгө дагуу торгон даашинзаар бүрдүүлсэн эрхэмсэг, дур булаам хэв маяг бидний харцыг булааж чадлаа.
Харин бороо шивэрсэн Парис хотод франц залуус цаг агаарын байдлыг үл харгалзан, өөрсдийн гоо зүйн өндөр мэдрэмжээ тусгасан шилдэг street style төрхүүдийг бүрдүүлсэн байв. Тухайлбал, газар шүргэсэн урттай тренч цув, сул эсгүүртэй савхин хослол, өнгөлөг ноосон эдлэлүүд, төрөл бүрийн амьтны болон цэцгэн хээ алгалсан загварууд, түрийтэй савхин гутлууд, хөнжил мэт хөвсгөр даашинз, цамц, юбка гэхчлэн яг одоо тренд болоод буй загваруудаар гоёсон хүмүүс Парис хотын гудамжийг чимжээ.
Ингээд Парис хотын загварын долоо хоногийн онцлох street style төрхүүдийг сонирхоцгооё.
