Кутюр загварын долоо хоног дээрх онцлох 9 нүүр будалт
Нүүр будалтын цоо шинэ аргачлалууд
Chanel
Ягаан туяагаар илэрхийлэгдсэн зөөлөн, эмэгтэйлэг дүр төрх. Нүүр хувиргагчид моделиудын уруулыг бага зэрэг неон туяатай ягаан-улаан өнгөөр тодотгож, хацар ба зовхийг тоорын-ягаан өнгөөр жигдрүүлэн будсан байлаа.
Christian Dior
Dior ордны сюрреалист аястай цуглуулгад зориулан мэргэжлийн нүүр хувиргагч Питер Филипс театрын гэмээр, анхаарал татахуйц контур зурсан байв. Тэрээр хар өнгийн контурын ачаар моделиудын сормуусыг чамархай хүртэл уртасгаснаар нүдийг нь илүү том болгон харагдуулжээ.
Giorgio Armani Prive
Гэрэлт чимэд чулуунаас сэдэвлэсэн пастель өнгийн будалт. Ногоон-цэнхэр туяатай зөөлөн тень, бага зэрэг арчигдсан мэт эффекттэй цайвар ягаан уруул зэрэг нь яг л усан будгаар зурсан мэт, гоёмсог төрх бүрдүүлжээ. Арчигдсан эффекттэй уруулыг бий болгохын тулд уруулынхаа хүрээний дагуу матт суурь крем хөнгөн түрхэх хэрэгтэй.
Viktor & Rolf
Холоос яг л нарны шил мэт харагдах энэхүү өвөрмөц нүүр будалтыг хэрэгжүүлэхийн тулд том ширхэгтэй сааг нүдээ тойруулан дөрвөлжин хэлбэрээр наахад л хангалттай.
Valentino
Тийм ч шинэлэг биш хэдий ч, маш цэмцгэр бөгөөд минимал будалт. Тод ягаан, неон улбар шар, солонгорсон ногоон гэх зэрэг өнгөтэй тениүдийг ашиглан дээш өргөгдсөн өнцөгтэй контур зурах хэрэгтэй.
Jean-Paul Gaultier
Дотор хэсэгтээ хоосон зайтай negative space төрлийн контур нь авангард хэв маягийн хувцастай сайхан зохицно.
Alexis Mabille
Хацар өнгөлөгчийн ачаар контуринг хийх аргачлал буюу дрейпинг будалт одоо ч алдартай хэвээр байна. Бага зэрэг улаан туяатай тод ягаан өнгийн хацар өнгөлөгч, час улаан уруулын будаг хоёр нь төгс хослол юм шүү.
Iris Van Herpen
Нүүр хувиргагчид энэ хавар-зуны гол тренд будалтыг танилцууллаа. Underliner хэмээн нэрлэгдсэн төрөл бүрийн тод өнгөтэй доод зовхины будалтыг заавал туршиж үзээрэй.
Alexandre Vauthier
Дрейпинг аргачлалын цоо шинэ хувилбар - омбре хэв маягаар шилжсэн өнгөтэй дрейпинг. Хацар өнгөлөгчийн тусламжтайгаар хийсэн цайвраас бараан өнгө рүү шилжсэн будалт өвөрмөц харагдах болно.
