Бид яг одоо нар багатай, хүйтэн, бага зэрэг гунигтай, мөн түгжрэлтэй "хүнд" саруудтай нүүр тулаад байна. Энэ үед ядахдаа хувцаслалтаараа сэтгэлээ багахан ч болов сэргээж халтирдаггүй, загварлаг гутлын ачаар өөртөө итгэлтэй алхахыг уриалж байна.
Өсгийтэй эсвэл өсгийгүй, сонгодог хар эсвэл цагаан, тугалын эсвэл могойн арьсан урт түрийтэй гуталнууд хүйтний улиралд зайлшгүй хэрэгтэй. Энэ жил ийм гутлыг брюк өмдөө түрийн дотор хийх байдлаар загварчилж өмсөөрэй.
Гэнэт бороо, цас орохыг тооцоолон энэ улиралд зузаан ултай резинэн, эсвэл арьсан челси загварын гутал сонгоорой. Ул нь зузаан байх тусмаа загварлаг.
Өсгий нь хэт өндөр биш, мөн хамгийн гол нь тэнцвэртэй байх учиртай. Мартин Маржелагийн сонгодог таби загвараас эхлээд Manu Atelier болон By Far брэндүүдийн геометрийн хэлбэртэй өсгийтүүдийг сонирхоорой.
Өдөр тутмын сонгодог загвар. Универсал загвар болсон "мартинс"-аас эхлээд Prada-гийн халаастай комбат загвар гээд сонголтын хувьд маш өргөн байгаа.
Сонгодог загварын арьсан гуталнуудаас залхаж байгаа бол Saint Laurent-ийх шиг ирвэсний хээтэй, эсвэл MM6-ийх шиг давхар түрийтэй ковбой гутлаар энэ улиралд гангараарай.
Bottega Veneta энэ улиралд 100% задралд ордог хуванцраар резинэн гутал урласан байгаа. Chloé мөн арзгар, зузаан ултай резинэн гутал санал болгосон. Thom Browne харин сонгодог хэв маягийг эрхэмлэн классик загварын усны гутал гаргажээ.
