Бюро өдөр тутам: Өнөөдрийн онцлох үйл явдлууд
2016 оны арваннэгдүгээр сарын 14
Шинэ долоо хоногийн мэнд! Нийслэл хотноо өнөөдөр өдөртөө -11 хэм, шөнөдөө -21 хэм хүйтэн байна. Үсээ засуулбал өлзийтэй сайн гэж дорнын зурхайд бичжээ.
• Өнөөдөр сар Дэлхийд хамгийн ойр буюу 356,508 км зайд ойртож ирнэ. Энэ үеэр сар 14% илүү том, 30% илүү тод харагдах болно. Ийм үзэгдэл хамгийн сүүлд 1948 онд болж байжээ. Харин 2034 оны арваннэгдүгээр сар хүртэл дахин ийм үзэгдэл тохиолдохгүй гэж space.com вебсайт мэдээллэж байна.
• Өчигдөр орой Хонг Конгийн жүжигчин, найруулагч Жеки Чан кино урлагийн салбарт оруулсан хувь нэмрийнхээ төлөө "Оскар"-ын хүндэт шагнал хүртсэн байна.
• Скарлетт Йоханссоны тоглосон "Ghost in the Shell" киноны анхны трейлер цацагджээ. Масамунэ Широгийн бичсэн алдарт манга зохиолоос сэдэвлэн бүтээсэн энэхүү кино нь 2017 оны гуравдугаар сарын 31-нд нээлтээ хийх болно.
• Энэ өдрийг дэлхийн нийт "Чихрийн шижинтэй тэмцэх өдөр" болгон тэмдэглэдэг. Шастины нэрэмжит улсын гуравдугаар төв эмнэлэг энэ талаар мэдээлэл өгч тусгай өдөрлөг зохион байгуулах болно.