Single's Inferno реалити шоуны дөрөвдүгээр бүлэг тун удахгүй цацагдана

Өмнөд Солонгос улсын хамгийн дуулиантай, алдартай реалити шоунуудын нэг бол мэдээж Netflix-ийн Single's Inferno. Тэгвэл гурвалжин, дөрвөлжин хайрын харилцаа, ширүүхэн өрсөлдөөнт тоглоом, сонирхолтой үйл явдлаар баялаг тус шоуны дөрөвдүгээр бүлэг цацагдахад бэлэн болжээ. 

Өмнөх бүлгүүдийн адилаар ганц бие оролцогчид “Там” хэмээн нэрлэгдсэн хүндхэн орчинд буюу эзэнгүй мэт арал дээр найман хоногийг өнгөрүүлэх бөгөөд өгөгдсөн өдрүүдэд бусад оролцогчидтойгоо танилцаж тэр дундаас бие биеэ олсон хосууд “Диваажин” гэх тансаг зэрэглэлийн зочид буудалд нэг шөнийг хамт өнгөрүүлэн, нэгнээ илүү сайн таньж, мэдэх байдлаар шоуны үйл явдал өрнөнө. Гэвч энэ удаагийн бүлэг илүү халуухан оролцогчид, шинэлэг дүрмүүд, адармаатай үйл явдлаар дүүрэн байх болно гэдгийг нэвтрүүлгийн багийн зүгээс мэдэгджээ. Мөн шоуны продюсер Ким Жэ Вон "Бид үзэгчдийн сэтгэгдэл, санал хүсэлтийг хүлээн авч, сайтар бодолцож үзсэний эцэст энэ удаагийн бүлгийг харьцангуй сонирхолтой, үзүүштэй байх тал дээр маш сайн анхаарсан" хэмээсэн байна. 

Single's Inferno шоуны дөрөвдүгээр бүлэг 2025 оны нэгдүгээр сарын 14-нд цацагдана. Харин оролцогчдын талаарх мэдээлэл уламжлал ёсоор нууц хэвээр байгаа юм.