Анхаарлын төвд: Дуучин Usher хувцас загварт нөлөөлнө
1990 оноос хойш зогсолтгүй уран бүтээлээ туурвиж, олны анхаарлын төвд байсаар ирсэн уран бүтээлч бол мэдээж дуучин Usher билээ. Тэрээр 2024 онд Past Present Future нэртэй аялан тоглолтоо Америкийн 24 хотуудаар амжилттай тоглож өндөрлүүлсэн. Тэгвэл энэ жил Usher Берлин, Парис, Амстердам тэргүүтэй Европын хотуудаар аялан тоглолтоо хийхээр болсон байна. Мэдээж Usher өөрийн тоглолтоо мэргэжлийн түвшинд зохион байгуулах нь гарцаагүй. Иймд ирэх өдрүүдэд болох түүний тоглолтуудын дууны дамжуулалт болон тоглолтын зохиомжийг шүүх илүүц биз ээ.
Харин аялан тоглолтын эргэн тойрон дахь халуун сэдвийн нэгээр түүний загварлаг хувцаслалтууд дурдагдаж байна. Тодруулбал, түүний аялан тоглолтод өмсөх хувцас загварыг стилист Яшуа Симмонс, Жереми Хэйнс, мөн Бейонсегийн RENAISSANCE аялан тоглолтын стилистээр ажилласан Шиона Турин нар хариуцан ажиллаж байгаа бөгөөд тэд Usher-ийг улам шинэлэг, загварлаг байдлаар харуулахаар төлөвлөж байгаа гэнэ.
Түүний өмнөх тоглолтууддаа өмссөн хувцаслалтыг сонжвол янз бүрийн хэв маягтай тодорхой сэдэвт баригдаагүй атлаа түүний карьерын гучин жилийн хугацаанд гаргасан дуу тус бүрд тохирсон имижтэй байсан гэдгээрээ онцлог байсан. Нөгөөтээгүүр Usher 15 наснаасаа хойш Versace, Marc Jacobs, Celine, Burberry, Dolce & Gabbana тэргүүтэй хувцас загварын салбартаа манлайлагч брэндүүдтэй хамтран ажиллаж ирсэн гэдгээрээ алдартай билээ.
Ингээд дуучин Usher-ийн Европын хотуудад болох аялан тоглолтын хувцаслалтыг хамтдаа харцгаая.
