Дональд Трамп "Гэртээ ганцаараа 2" кинонд тоглосон нь түүний хувьд нэр төрийн хэрэг байсан гэв

АНУ-ын ерөнхийлөгч Дональд Трамп хилийн чанадад алба хааж буй Америкийн цэргүүдтэй видео конференц хийх үедээ тэдний сонирхсон асуултуудад хариулсан байна.

Энэ үеэр нэгэн цэрэг Трампаас түүний тоглосон "Гэртээ ганцаараа 2" киноны талаар асуужээ. Хариуд нь ерөнхийлөгч "Гэртээ ганцаараа 2 их сайн кино болсон. Би тухайн үед арай залуухан байсан. Мэдээж хэрэг энэ кино жинхэнэ хит болсон. Ер нь түүхэнд бүтээгдсэн хамгийн том зул сарын баярын хитүүдийн нэг. Тус кинонд тоглосон нь миний хувьд нэр төрийн хэрэг байсан" хэмээн мэдэгджээ.

Эргэн сануулахад Крис Колумбус найруулж, Жон Хьюз продюсерлосон "Гэртээ ганцаараа" киноны хоёрдугаар анги 1992 онд нээлтээ хийж байсан бөгөөд тухайн үедээ 359 сая ам.долларын орлого олж байв. Киноны үйл явдалд Кевин Маккаллистер (Маколей Калкин) гэр бүлээсээ тусгаарлагдаж, Нью-Йорк хотод ганцаараа үлддэг билээ. Харин гол дүрийн баатар Кевин Plaza зочид буудлын үүдний хэсэгт Дональд Трамптай тааралдан түүнээс зам асуудаг юм.