1980-аад он руу аялуулсан Saint Laurent брэндийн шинэ цуглуулга

Saint Laurent брэнд Парисын загварын долоо хоногийн хүрээнд намар-өвөл 2023 цуглуулгаа танилцууллаа. Тэд энэ удаа Эйфелийн цамхгийн өмнө биш, харин тусгайлан барьсан өрөөнд загварын шоугаа зохион байгуулжээ. Ингэхдээ тус өрөөний дотоод заслыг 1976 онд Ив Сен Лораны кутюр цуглуулгаа толилуулдаг байсан InterContinental зочид буудлын дизайнаар хийсэн байна.

Бүтээлч захирал Энтони Ваккарелло цуглуулга дээр ажиллахдаа загварын ордны архиваас сэдэвлэж, мөн 1988 онд нээлтээ хийж байсан “Working Girl” киноны хувцаслалтаас урам зориг авсан байна. 1980-аад онд эрэгтэйчүүд давамгайлдаг байсан ажлын талбарт анхны алхмаа хийж буй эмэгтэйчүүд өөрийн байр сууриа бий болгохын тулд мөрөндөө маш том зөөлөвчтэй хүрэм, нүсэр хэмжээтэй үнэт эдлэл зүүдэг байсан. Яг үүний адил Saint Laurent-ын шинэ цуглуулгад мөрийг нь өндөрлөсөн oversized пиджак, харандаа хэлбэрийн юбка, савхин хүрэм, авиатор стилийн нарны шил, гадсан өндөр өсгийт багтжээ.