Моделиуд болон роботууд алхсан Coperni брэндийн загварын шоу
Хавар-зун 2023 загварын долоо хоногийн үер дуулиан дэгдээсэн Coperni брэндийн үзүүлбэрийг санаж байна уу? Хагас нүцгэн Белла Хадидын биен дээр тусгай төхөөрөмжөөр шүршиж хүрэлцэн ирсэн зочдын өмнө хэдхэн хормын дотор даашинз бүтээж үзүүлсэн билээ. Тэгвэл энэ удаа Coperni урьд нь тогтоосон амжилтаа хадгалах зорилгоор робот оролцуулсан онцгой нэгэн загварын шоу толилууллаа.
Брэндийн бүтээлч захирлууд болох Арно Вайон, Себастьян Майэр нар ирээдүй рүү чиглэсэн концепцоо үргэлжлүүлэн баримталжээ. Тэд роботуудыг хүн төрөлхтөнд захирагдаж, эсвэл тэднийг захирч байгаа талаас биш, харин хүмүүстэй ижил түвшинд зэрэгцэн амьдарч байгаагаар харуулахыг зорьсон байна.
Шоуны үеэр нэгэн робот Рианн ван Ромпей моделийн гадуур өмссөн нөмрөгийг тайлж, дараа нь эргүүлэн өгч буй дүр зураглал хүмүүсийн анхаарлыг хамгийн ихээр татсан юм. Мөн роботууд дан ганц загвар өмсөгчдөөс гадна танхимд сууж байсан үзэгчидтэй холбоо тогтоож байжээ.
Цуглуулгад Coperni-гийн нэрийн хуудас болсон тэгш бус хэмтэй загварууд зонхилсон байна. Үүнээс гадна тэд алдарт “Swipe” цүнхнийхээ солирын хэлтэрхийгээр урласан хосгүй хувилбарыг танилцуулсан юм. Тус цүнхийг хийхэд ашигласан солир нь 1968 онд Францын өмнөд нутгаас олдсон бөгөөд 55,000 орчим жилийн өмнө анх дэлхий дээр унасан гэдэг нь батлагджээ.
