Энэ хаврын тренч цувнууд: 6 чиг хандлага
Хээтэй, цацагтай, савхин болон бусад
Уламжлалт бус эсгүүр
Жунья Ватанабе хаврын цуглуулгаа бүхэлд нь тренч цувнуудад зориулжээ. Дизайнер уламжлалт эсгүүрийг олон хэсэг болгон "сүйтгэж", хэсгүүдийг авангард байдлаар хооронд нь холбож оёсноор маш сонирхолтой загваруудыг гарган авсан байна. Юүдэнтэй нөмрөг, бэлхүүс тодотгосон хүрэм, харандаа хэлбэрийн юбка болон урт даашинз болгож хувиргасан тренч цувнуудаас сонголтоо хийгээрэй.
Савхин материал
Олны анхаарлыг татахыг хүсэж байвал энэ улиралд савхин материалтай тренч цув сонгоход л хангалттай. Яг л "The Matrix" дээрх Тринити шиг сүрлэг харагдана гэдэгт итгэлтэй байж болно шүү. Мөн зөвхөн хар гэлтгүй Coach брэндийн санал болгосон шиг улаан, эсвэл Bottega Veneta-гийн цуглуулгад багтсан шиг усан цэнхэр өнгөнүүдээс сонголтоо хийгээрэй.
Коллаж загвар
Энэ улиралд дизайнерууд хэн хамгийн сонирхолтой тренч цув бүтээхээ сорихыг хүссэн гэлтэй бүгд маш өвөрмөц хувилбаруудыг танилцуулаад авлаа. Савхин оруулгатай, торгон чимэглэлтэй, дөрвөлжин хээтэй гээд олон хэсгээс бүрдсэн "коллаж" загварууд тренд болжээ.
Эмэгтэйлэг хэв маяг
Цацагтай, бөмбөгөр ханцуйтай, сувдан чимэглэлтэй зэрэг романтик загварууд мөн эрэлт ихтэй байна. Илүү зөөлөн, эмэгтэйлэг төрх бүрдүүлэх дуртай хүмүүст энэ тренд гарцаагүй таалагдах биз ээ.
Төрөл бүрийн хээ
Дизайнерууд сонгодог тренч цувны эсгүүрийг төрөл бүрийн хээ, угалзаар баяжуулснаар бас нэгэн шинэлэг тренд бий болгоод байна. Дөрвөлжин, цэцгэн, ургамлын, урлагийн абстракт гээд бүх төрлийн хээнүүд үзэгдсэн байгаа.
Минимал хийц
Минимал стиль баримтлагчдад сайхан мэдээ дуулгахад энэ улирлын үндсэн трендүүдийн нэгээр нэрлэгдэж буй ямар ч илүү дутуу детальгүй, цэмцгэр, сонгодог тренч цувнууд Dior, Alexander Wang, Burberry брэндүүдийн шинэ цуглуулгад багтжээ.
