Торонтогийн олон улсын кино наадмын зочид
Леонардо ДиКаприо, Том Форд, Мэтт Дэймон ба бусад
Торонтогийн кино наадам нь Оскарын шагналд өрсөлдөх боломжтой кинонуудын гараа гэж үздэг. Тиймээс тус кино наадамд танилцуулагдах бүтээлүүдийн жагсаалтанд ихэвчлэн сайн кино л багтдаг юм. Энэ жил Торонтогийн кино наадамд Дензел Вашингтон тоглож, Антуан Фукуагийн найруулсан "The Magnificent Seven", Оливер Стоуны "Snowden", Дэмьен Шазеллын "La La Land" мөн Юэн МакГрегорын найруулсан анхны бүтээл болох "American Pastoral" зэрэг кинонууд танилцуулагдах болно.
Кино наадамд танилцуулагдаж байгаа бас нэг онцлох бүтээл бол жүжигчин Ц.Цэрэнболдын тоглосон "Burn Your Maps" кино юм. Киноны үйл явдалд найман настай Америк хүү өөрийгөө монгол малчин гэж итгэх ба өөрийн гэр бүлийн хамт Монгол руу аялдаг. Энэ тухай жүжигчин Ц.Цэрэнболд бидэнд өмнө нь дэлгэрэнгүй ярилцлага өгсөн байгаа.
Дашрамд дурдахад Торонтогийн олон улсын кино наадам есдүгээр сарын 18-н хүртэл үргэлжилнэ.
