Ричард Брэнсон зочид буудлын бизнесийг шинэчилнэ

Ричард Брэнсон бол магадгүй дэлхийн хамгийн санаачлагатай, овсгоотой бизнесмэн юм. Түүний аварга том Virgin Group-д яг хэдэн компани хамаардгийг одоо болтол хэн ч мэдэхгүй байна. Бас энэ группын үүсгэн байгуулагчийн хийсэн бүх зүйлсийг санах тун хэцүү юм. Тэрбээр хийж буй зүйлдээ гайхалтай эрч хүчтэйгээр ханддаг нь түүний хийсэн огторгуйн аялал, төмөр зам, телефон холбоо, агаарын тээвэр гээд бүх л зүйлд нь харагдаж билээ. Тэр бас шинэ төслүүдийнхээ дундуур бестселлер ном бичиж телевизийн шоунд орж амждаг байна. 

Хагас жилийн өмнө сэр Ричард Чарьлз Николас зочид буудлын бизнест хөл тавьж анхны буудлаа Чикаго хотод нээжээ. Мэдээж хэрэг тэрбээр зүгээр нээлт хийхээс өмнө зочид буудалд нилээд олон чухал шинэчлэл өөрчлөлтүүдийг оруулсан. Энэхүү зочид буудлын жишээгээр Брэнсон үйлчлүүлэгчдийн ундууцлыг хамгийн их хүргэдэг зүйлсийг засаж үзүүлэхээр оролджээ.

Эхний алхам нь мини-барны тэнгэрт тулсан үнэ. Бид бүгд л жижигхэн хөргөгчнөөс шоколад авч идээд сүүлд төлбөр нь загасны түрстэй адил гарч байсан явдалтай учирч байсан билээ. Тиймээс Virgin Hotels хэт хөөргөдсөн үнийг өөрчлөхөөр шийдэж мини-барын үнийн жагсаалтыг энгийн супермаркетуудтай адилтган тавьжээ.

Дараагийн алхам нь бүх зочдод хүртээмжтэй байх өндөр хурдны Wi-Fi. Энэ нь ямар нэгэн сайтад бүртгүүлж эсвэл бүтэн нэг өрөөний үнээр шахам хэрэггүй багц худалдан авах шаардлагагүй байх юм.

Ингээд энэ давуу талууд дээр сонгодог болон орчин үеийн загварын зохицолдоог гаргасан тухлаг даруу интерьер мөн байшингийн өмнөх эзэн Dearborn Bank-наас өвлөж ирсэн өвөрмөц сигар-барыг нэмбэл төгс зочид буудал болж байгаа билээ. Мэдээж хэрэг Брэнсон ганц зүйл төлөвлөөгүй. Нэмж үүнтэй төстэй хорь орчим зочид буудал барихаар бэлджээ. Дараагийн төсөл нь хэрэгжиж эхэлсэн ба 2016 онд Нэшвилл хотноо ашиглалтанд орно.