К-поп охидын хамтлагийн гишүүдийн будалтыг хэзээ ч хэтрүүлэгтэй гэж нэрлэх боломжгүй аж. Тэд гялалзсан эрүүл арьсаараа гоёж, зөөлөн будалтууд хэрэгжүүлснээр байгалийн төрхийг улам л эрэлттэй болгосоор байна. Иймд к-поп хэв маягийн будалтад хамгийн гол нь чийглэг, гялалзсан арьс чухал тул арга хэмжээний өмнөх орой болон будалтынхаа өмнө арьсаа сайтар чийгшүүлж, тордоорой. Мөн нүдний доорх хөх туяаг арилгах зорилгоор доод зовхин дээрээ гелэн бүтэцтэй зовхины маск тавьж болно. Харин будалтын хувьд саатай ягаан тень, шингэн бүтэцтэй хацар өнгөлөгч, уруул өнгөлөгч, эсвэл матт уруулын будаг байхад л хангалттай. Түүнчлэн солонгос охидын дунд өнгө өнгийн нүдний линз маш эрэлттэй бөгөөд та өөрт таалагдсан өнгөө сонгон хэрэглээрэй.

Шинэ жилийн үдэшлэгийн гоо сайхны төрхөө гялтганасан саагүйгээр төсөөлөхгүй байгаа бол анхаарлаа нааш хандуулаарай. Гял цал, хээнцэр хэв маяг бүрдүүлэхэд мэдээж гялалзсан саа болон шигтгээнүүд хэрэг болдог. Яг одоо TikTok дээр “snowy angel” гэх нэртэй нүдний мөнгөлөг саа давамгайлсан бичлэгүүд маш их үзэлттэй байна. Уг будалтыг хэрэгжүүлэхийн тулд дээд зовхин дээрээ нүдний праймер түрхэж, саарал тениэр будаж, хавтгай багсаар тараана. Дараа нь давхрааны дээд болон хөмсөгний доод хэсэгт саагаа түрхэнэ. Сүүлд нь нарийн цагаан контураар нүдний төгсгөл болон урд хэсгийг будах хэрэгтэй. Харин уруулаа тод ягаан, эсвэл улаан өнгөөр будвал зохимжтой.

Энэ онд загварын ертөнц тэр чигтээ Барби хүүхэлдэйг санагдуулам Valentino-гийн тод ягаан өнгөөр амьсгалсан гэхэд хилсдэхгүй. Тиймээс өнгөлөг будалт хийхийг хүсэж буй уншигчид маань энэхүү өнгийг ашиглан гоёлын будалт хийгээрэй. Санаа авахыг хүсвэл намар-өвөл 2023 улирлын загварын шоунууд дээр тайзнаа алхсан моделиудын будалтуудыг анхааралтай ажиглахыг зөвлөж байна. Неон ягаан контур, нүдний тень, харандаа гээд хүссэн бүтээгдэхүүнээ ашиглан хэн бүхний харцыг булаах будалт хэрэгжүүлээрэй.

Алдарт Брижит Бардо, Твигги нарын нэрийн хуудас болсон өргөн хэлбэртэй контур, урт хиймэл сормуус, пастель өнгийн тень гээд 1960-аад онд зонхилж байсан трендүүдийг санаж байна уу? Тэгвэл үдэшлэгтээ зориулж ретро хэв маягийн будалт хэрэгжүүлэх цаг иржээ. Ингэхдээ хоёр зураас бүхий, эсвэл харандаа ашиглан дээд зовхин дээрээ маш урт, өргөн контур зурах хэрэгтэй. Илүү сүрлэг, тод будалт хийхийг хүсвэл шингэн, гелэн бүтэцтэй контур, эсвэл өргөн үзүүртэй харандаа ашиглахад тохиромжтой. Харин зөөлөн бүтэцтэй, нарийн үзүүртэй харандаагаар доод сормуусны дотор талыг тодруулж болно. Мөн дээд болон доод сормуусаа хар будгаар тодруулан будна.