Ирж буй шинэ сард сэтгэл сэргээм үйл явдлаар дүүрэн, сонирхолтой адал явдлаар баялаг, үзэгчдэд хором ч уйдах завдал өгөмгүй олон кино, цувралууд нээлтээ хийх төлөвтэй байна. Эдгээрээс бид үзэгчдийн дунд өндөр хүлээлттэй байгаа долоон бүтээлийг онцлон танилцуулахаар бэлтгэлээ. 

Kinda Pregnant 

Нээлтээ хийх огноо: Хоёрдугаар сарын 5

Романтик, инээдмийн жанрын тус кинонд Лэйни хэмээх бүсгүй жирэмсэн найздаа атаархан, улмаар эргэн тойрны хүмүүстээ өөрийгөө бие давхар болсон хэмээн худал хэлж итгүүлнэ. Ийнхүү хуурамч гэдэс зүүж, жирэмсэн болсон мэт жүжиглэх явцдаа Лэйни мөрөөдлийнхөө залуутай учирснаар ээдрээтэй үйл явдлын эхлэл тавигдана. 

Kinda Pregnant киноны гол дүрд Ginny & Georgia цувралын од Брианна Хоуи болон жүжигчин Эми Шумер нар тогложээ. Харин продюсерын үүргийг хөгжилтэй, хошин дүрүүдээрээ алдартай жүжигчин Адам Сэндлер гүйцэтгэсэн байна.

Melo Movie 

Цацагдах огноо: Хоёрдугаар сарын 14

Our Beloved Summer цувралын зохиолч И На Ины ээлжит бүтээл болох Melo Movie цуврал Валентины баяраар үзэгчдийн хүртээл болохоор төлөвлөгджээ. Энэхүү цувралд Parasite киногоороо дэлхий нийтэд танигдсан жүжигчин Чой Ү Шиг болон Strong Girl Bong-soon цувралаараа алдартай жүжигчин Пак Бу Ён нар дүр бүтээсэн байна. 

Үйл явдалд мелодрам төрлийн кино хийхийг мөрөөддөг оюутан бүсгүй Ким Мү Бэ болон түүнд дурласан залуу Кү Гём-ийн тухай өгүүлнэ. Гэвч Кү Гём бүсгүйд сэтгэлээ илчсэнийхээ дараа ор сураггүй алга болно. Уг үйл явдлаас хэдэн жилийн дараа бүсгүй алдартай кино найруулагч болсон байх бөгөөд түүний бүтээсэн шинэ киноны нээлт дээр Кү Гём гэнэтхэн гарч ирснээр цуврал цааш үргэлжилнэ. 

The White Lotus 3 

Цацагдах огноо: Хоёрдугаар сарын 16

HBO Max-ын хамгийн алдартай бүтээлүүдийн нэг болох White Lotus цувралын гуравдугаар бүлэг үзэгчдийн хүртээл болоход бэлэн болжээ. Бүлэг бүр дээрээ тансаг зочид буудалд амарч буй баячуудад тохиолдох сонирхолтой, адал явдалт өөр, өөр түүхийг өгүүлдэг тус цувралын шинэ бүлгийн үйл явдал Тайланд улсад өрнөх болно. Тэр ч утгаараа Тайланд улсаас гаралтай дуучин, BLACKPINK хамтлагийн Лиса гуравдугаар бүлэгт дүр бүтээсэн байна. 

Цувралын найруулагч Майк Уайт шинэ бүлгийн талаар "Эхний бүлэгт бид эд хөрөнгө болон хүн чанарыг, хоёрдугаар бүлэгт сексийг онцолж харуулсан бол энэ удаагийн бүлгийн үйл явдал түлхүү үхэл, зөн совин, шашин дээр суурилах болно" хэмээн мэдэгджээ. 

My Dearest Nemesis 

Цацагдах огноо: Хоёрдугаар сарын 17

Black Salt Dragon хэмээх webtoon-ээс сэдэвлэн бүтээсэн энэхүү цувралын гол дүрд залуу жүжигчин Чой Хён Үг, Мүн Га Ён, Им Сэ Ми нар тогложээ. Үйл явдал видео тоглоомд дуртай ч түүнийгээ нуудаг томоохон компанийн гүйцэтгэх захирал Бан Жү Ён гэх залуу 16 жилийн дараа анхны хайртайгаа дахин учирснаар эхэлнэ. Харин бүсгүй түүнийг таних болов уу? 

Сонирхуулахад, таван жилийн өмнө жүжигчин Мүн Га Ён болон Им Сэ Ми нар True Beauty хэмээх цувралд эгч дүүсийн дүрийг бүтээж байсан ба ийнхүү дахин шинэ төсөл хамтран ажиллаж буй нь үзэгчдийн дунд багагүй хүлээлт үүсгээд эхэлсэн байна.

Suits:L.A. 

Цацагдах огноо: Хоёрдугаар сарын 23

Анх 2011 онд үзэгчдийн хүртээл болж байсан Suits цуврал 2023 онд Netflix платформ дээр тавигдаж, дахин анхаарлын төвд орсон билээ. Улмаар өнгөрсөн онд тус цувралын спин-офф Suits:L.A. цуврал хийгдэхээр болсон тухай кино багынхны зүгээс мэдэгдсэн. 

Тэгвэл Suits:L.A цуврал хоёрдугаар сарын 23-ны өдрөөс эхлэн NBC сувгаар цацагдах болсон бөгөөд үйл явдал энтертайнмент хэргүүд дээр ажилладаг Black Lane Law хэмээх хуулийн фирмийн эргэн тойронд өрнөнө. Хуулийн фирмийн эзэн Тед Блэкийн дүрд жүжигчин Стивен Амелл тогложээ. Мөн Suits цувралын од, жүжигчин Габриэль Махт спин-офф цувралын эхний анги дээр Харви Спектрийн дүрээ дахин бүтээхээр болсон байна.

Last Breath 

Нээлтээ хийх огноо: Хоёрдугаар сарын 28

Жүжигчин Вуди Харрельсон, Симу Лю, Финн Коул нарын тоглосон триллер жанрын тус киног 2019 онд гарсан ижил нэрт баримтат киноноос сэдэвлэн бүтээжээ. Тус хоёр кино нь хоёул найруулагч Алекс Паркинсоны бүтээл гэдгээрээ үзэгчдийн анхаарлыг татаад байгаа юм. 

2012 онд болсон бодит явдлын тухай өгүүлэх Last Breath кинонд далайн гүнд алга болсон хамтрагчаа аврахын тулд бүхий л чадлаараа хичээж буй мэргэжлийн шумбагч багынхны тухай өгүүлнэ. 

Mickey 17 

Нээлтээ хийх огноо: Хоёрдугаар сарын 28

2020 оны Оскарын наадмаас голлох дөрвөн шагналыг хүртэж, тэр дундаа шилдэг кино хэмээх хүндэт шагналыг авсан анхны гадаад кино болох Parasite бүтээлийн найруулагч Бун Жүн Хугийн ээлжит кино Mickey 17 үзэгчдийн дунд өндөр хүлээлт үүсгээд байгаа билээ. Тус кино нь зохиолч Эдвард Эштоний Mickey 7 нэртэй номоос сэдэвлэн бүтээгдэж байгаа ба гол дүрүүдэд Роберт Паттинсон, Наоми Акки, Стивен Юн, Тони Коллет, Марк Руффало зэрэг чадварлаг жүжигчид тоглож байгаа юм.

Мики Барнс хэмээх залуу Нифлхайм гарагийг колоничлох багт сонгогдож, амь өрссөн даалгаврыг биелүүлэх шаардлагатай нүүр тулж буйгаар үйл явдал эхэлнэ. Хэрэв даалгавраа биелүүлэх үедээ амь үрэгдвэл түүний ой санамжийг салган авч, биеийг нь клоны аргаар хувилан, дахин дайны талбар руу илгээдэг аж. Ийнхүү Мики Барнс долоо дахь удаагаа үхэж, дахин сэргэхэд өөрийнхөө төсөөлөөгүй зүйлтэй нүүр тулж буйгаар кино цааш үргэлжилнэ.