Фаррелл Уильямс Louis Vuitton-ы шинэ бүтээлч захирлын хувиар анхны цуглуулгаа толилууллаа

Удаан хүлээсэн Louis Vuitton-ы хавар-зун 2024 эрэгтэй цуглуулга ил боллоо. Нөлөө бүхий хөгжмийн продюсер, дуучин, реппер, 13 удаагийн Грэммийн шагналт, streetwear хувцасны Human Made, Billionaire Boys Club, G-Star Raw брэндийн хамтран эзэмшигч гээд энтертейнмент салбарт олон төрлийн чадваруудаараа гоцолсоор ирсэн Фаррел Уильямс тус цуглуулга дээр ахалж ажилласан билээ. Эргэн сануулахад, Фаррелыг Louis Vuitton-ы бүтээлч захирлын албанд өнгөрөгч хоёрдугаар сард томилсон бөгөөд дийлэнх хүний таамаглаагүй тус шийдвэрийг загварын ордны гүйцэтгэх захирлын үүргийг хүлээн аваад удаагүй байсан Пиэтро Беккари гаргасан юм.

Шинэ цуглуулга хайр, баяр баяслыг түгээхээр бүтээгджээ. Фарреллын энэ зорилго нар ээж буй Pont Neuf гүүрний зураг дээр “LVers” буюу LV lovers хэмээн бичигдсэн шоуны урилгаас эхлэн мэдэгдэнэ. Тэрээр нарыг ертөнц дээрх амьдралын эх сурвалж хэмээн үздэг бөгөөд тус санаагаа “Аливаа зүйлийг хийхээр сонгогдсон ийм мөчид нар чам дээр тусдаг. Би өөрөөсөө болон хайрладаг хүмүүсээсээ ‘Хэрэв чиний дээр нар тусвал, гэрлээр нь чи юу хийх вэ?’ гэж үргэлж асуудаг. Миний өмнө тус боломж гарч ирэн нар намайг гэрэлтүүлэхэд амьдрал минь орвонгоороо өөрчлөгдсөн” хэмээн тайлбарласан юм. Мөн тэрээр бүтээлч захирлын хувиар ажиллахдаа хоёр зүйлийг ягштал баримтлахаа хэлсэн билээ. Нэгдүгээрт, ямагт суралцсаар байдаг хүний хувьд бүх мэдлэгээ бусадтай хуваалцах. Хоёрдугаарт, хайр болон талархлаа түгээхийг зорих гэнэ.

Цуглуулгын гол фокус Louis Vuitton-ы алдарт Damier хээн дээр төвлөрчээ. Яг л шатрын хөлөг шиг харагдах тус хээг Фаррелл Уильямс камуфляж стилиэр (эсвэл Minecraft-ын ертөнцөөс улбаалан) шинэчилсэн байлаа. Мөн Damier хээг өмнө нь түлхүү бор, шаргал өнгөний тод, цайвар гэсэн хоёр туяаг хоршуулан хийдэг байсан бол Уильямс олон төрлийн өнгө, уусгалт ашигласнаараа шинэлэг болжээ. Үр дүнд нь пиксель бүрээрээ ялгарч харагдах чанаргүй зураг мэт бүтээлч дүрслэл үүссэн байв. Damier деним, damier тренч цув, damier хослол… Хавар-зун 2024 цуглуулга damier хээнд бүхэлдээ будагджээ.

Харц булаасан бас нэгэн зүйл нь аксесуарууд байлаа. Louis Vuitton-ы ертөнцийг цүнхгүйгээр төсөөлшгүй бөгөөд цилиндр хэлбэртэй Keepall, сонгодог загварын Alma, шоппер стилийн Neverfull цүнхнүүд бүгд шинэчлэгдсэн өнгө төрхтэйгөөр цуглуулгад зонхилсон байв. Түүнчлэн бүтээлч захирлын ихэд таашаадаг өндөр малгайны хэлбэр, нарны шилний загварууд Louis Vuitton-ы гоо зүйтэй төгс тохирч болдгийг эдгээр загварууд харуулсан юм.

Загварын шоуг үзэхээр Рианна, ASAP Rocky, Зендея, Лоу Роуч, Ким Кардашьян зэрэг энтертейнмент салбарынхан, Жереми Скотт, Жонатан Андерсон, Николя Жескьер, Стефано Пилати гэхчлэн дэлхийн шилдэг дизайнерууд төдийгүй загварын шоунуудаар ховорхон зочилдог Бейонсе, Jay-Z нар хүрэлцэн ирсэн юм.

Фаррелл Уильямсын дебют цуглуулга хангалттай амжилттай болсон хэмээн дийлэнх мэргэжилтнүүд үзэж байгаа ч Financial Times-ын “Louis Vuitton хэрэгцээгүй шахам зүйл гаргасныхаа дараа тэдгээрийг нь худалдан авах хэрэглэгчдээ олж чаддаг” гэх тодотголтой санал нийлэх хүмүүс ч бишгүй их  байна.