“Би үнэхээр л эгэл зүйл ихийг илэрхийлдэг гэж боддог. Гэхдээ илүү шинэлэг байдлаар”
Loewe брэндийн бүтээлч захирал Жонатан Андерсон загварын ертөнцийн зорилго, мөн чанарыг контемпорари сюрреалист загваруудаараа тодорхойлдог. Ингэхдээ тэрээр харааны төөрөгдөл бий болгосон, тэгш бус хэмтэй силуэт гаргахыг илүүд үздэг билээ. Андерсоны баримталдаг тус арга барил нь хавар-зун 2024 эрэгтэй цуглуулга дээр ч мөн биеллээ олжээ.
Тайзнаа цувран алхах моделиудыг харахад яг л загасны нүдэн камерын линзээр газраас дээш чиглүүлэн харж байгаа мэт зураглал үүссэн байлаа. Өөрөөр хэлбэл, хөл уртасгаж, цээж богиносгосон маш өндөр суудалтай өмд, богино цамц зэрэг загварууд цуглуулгад зонхилжээ. Мөн угсардаг лего мэт харагдах тэгш бус хэмтэй ноосон цамцны силуэтийг онцлох деталиар нэрлэх боломжтой. Жонатан Андерсон үүгээр дамжуулан харааны хуурмаг байдлыг үүсгэхийг зорьжээ. Эдгээрээс гадна бүтээлч захирал гялалзсан саатай загваруудыг хараандаа авсан нь цуглуулгаас анзаарагдана. Эрэгтэй загварын долоо хоногийн үеэр тэр бүр ажиглагдаад байдаггүй энэхүү материалыг сонгосон шалтгаанаа тэрээр “Миний бодлоор саа бол дэлгэцийн цаанаас харсан ч бай, бодитоор харсан ч бай төөрөгдөл үүсгэж чаддаг зүйл” хэмээн тайлбарласан байна. Үүнээс гадна бас нэгэн онцгой загвар байсан нь даавууны өөдсийг аварга том зүүгээр цээжтэй нь нэвт сүлбэж тогтоосон мэт харагдах топ байлаа. Тус загвар нь яг л цаасан дээр гаргадаг moodboard бодит амьдрал дээр биеллээ олсон мэт сэтгэгдэл төрүүлэх зорилготой байна.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт