Нью-Йоркийн загварын долоо хоног, хавар-зун 2023 цуглуулга
Бүтээлч захирал Стюарт Виверс энэ удаагийн цуглуулгаа Нью-Йорк хотын усан онгоцны зогсоол дээр өрнөдөг амьдралаас сэдэвлэн урлажээ. Тэрээр тайзны засал болон загварын шоуны өмнөх бүжгийн үзүүлбэрээр дамжуулан усан онгоцны зогсоол дээр байгаа мэт орчныг бүрдүүлж, үүгээрээ өөрсдийн өв, соёлоо дурсахыг зорьсон байна. Мөн дизайнер Виверс уламжлалаа поп соёлтой хослуулан загвар болон тансаг хэрэглээний үнэ цэнийг шинээр тодорхойлохыг уриалжээ.
Цуглуулгад багтсан загваруудыг савхин эдлэл, нэхмэл загвар, винтэж хэв маягтай богино даашинз гэсэн гурван бүлэгт хуваах боломжтой. Савхин эдлэлүүдийн хувьд давхар энгэртэй, oversize, шулуун силуэттэй байх ба өнгөрсөн улирлуудтай харьцуулахад макси биш, миди урттайгаар хийгджээ. Олон жил эдэлсэн мэт харагдуулж, дахин дахин өмсөх хүслийг төрүүлэх зорилгоор зориуд элэгдэж, цайрсан гадаргууг бий болгосон байна. Мөн Coach загварын ордон өөрсдийн нэрийн хуудас болсон арьсан аксесуаруудаасаа гадна нил ягаан, алтлаг, хүрэн, ногоон өнгийн зөөлөн бүтэцтэй хуванцар сандаал болон цүнхийг толилуулж анхаарал татлаа.
Загварын шоуг хааж дуучин Lil Nas X алхсан нь түүний моделийн карьерын дебют байв. Тэрээр дэлхийг тойрон аялах тоглолтууд дээрээ Coach-ын загваруудаар гоёх дуртай үнэнч хэрэглэгчдийнх нь нэг бөгөөд саяхан брэндийн олон улсын төлөөгчөөр сонгогдсон юм.
Бусад Нийтлэлүүд
Buro 24/7-гийн сонголт
Редакторын Сонголт
Buro 24/7-гийн сонголт