Зөвхөн нэг эсийн ихэр моделиудыг алхуулсан Gucci брэндийн загварын шоу

Gucci брэндийн бүтээлч захирал Алессандро Микеле хавар-зун 2023 цуглуулгаа нэг эсийн ихэр ээжээсээ урам зориг аван урлажээ. Алессандро Микеле “Би хоёр ээжтэй. Эральда болон Жулиана. Тэд ижилхэн биед амьдардаг. Тэд адилхан хувцаслаж, адилхан янзаар үсээ самнадаг. Тэд бие биеийнхээ тусгал нь болдог юм. Энэ бол миний хоёр ижил ертөнц” хэмээн өөрийн захидалдаа бичсэн ба адилхан загвартай хувцсыг олноор нь үйлдвэрлэлээ гээд хүмүүс хоорондоо ижил болохгүй, тэдний дотоод ертөнц, хувь хүний онцлог үргэлж ялгарч байдаг гэх санааг цуглуулгадаа шингээжээ. 

Загварын шоуны хувьд тусгай зохиомжтой явагдсан нь хүрэлцэн ирсэн зочдыг болон Youtube-ээр шууд дамжуулалт үзэн суусан хүмүүсийн сэтгэлийг догдлуулж чадсан юм. Тодруулбал, дизайнер шоу зохион байгуулагдсан өрөөг ханаар тусгаарлан хоёр тусдаа танхимыг бий болгосон ба өрөө тус бүрд зочдыг хуваарилан суулгаж, мөн ихэр моделиудыг тусад нь алхуулсан байна. Өөрөөр хэлбэл, хананы наана болон цаана яг ижил арга хэмжээг нэг мөчид зохион байгуулжээ. Улмаар тусгаарлагч хана дээш эвхэгдэн хураагдаж хоёр талд ижилхэн хувцасласан ихэр моделиуд зэрэг алхаж байсан нь зочдод ил болдог. Ийнхүү ихэр загвар өмсөгчид тайзны голоор хөтлөлцөн дахин нэг удаа алхаж загварын шоуг төгсгөдөг билээ. 

Цуглуулгад гуя гарсан ухлаадастай брюкэн өмд, газар шүргэсэн урттай цув, амьтны хээтэй гутал, олон давтамжит геометрик болон цэцгэн хээтэй хослол, монгол дээлийн захтай торгон даашинз зэрэг Микелегийн нэрийн хуудас болсон максималист загварууд зонхилжээ. Түүнчлэн тэрээр англи домгийн дүр Гремлиний хэвлэлтэй даашинз, сандаал, цүнхнүүдийг урласан байна.