Кайли Женнер бяцхан охин Стормигийн хамтаар Harper’s Bazaar cэтгүүлийн зураг авалтад

Кайли Женнер Америкийн Harper's Bazaar сэтгүүлийн гуравдугаар сард зориулсан дугаарын гол зочноор уригджээ. Уг зураг авалтад зориулан Кайли хэд хэдэн төрх бүрдүүлсэн ба зарим зураг авалтыг түүний үүсгэн байгуулсан Kylie Cosmetics компанийн оффист хийсэн байна. XVII зууны язгууртныг санагдуулам Oscar de la Renta-гийн дэрвэгэр хормойтой даашинз, Dolce & Gabbana брэндийн дуурийн театрын өмсгөл мэт кутюр даашинз, Valentino-гийн өдөн чимэглэлтэй нөмрөг ба комбинзон, Тhom Browne брэндийн хэтрүүлэгтэй даашинз зэрэг олон гайхалтай төрхийг Кайли туршиж үзжээ. Харин охин Сторми Вебстертэй хамт орсон зургандаа тэрээр Францын хатан хаан Мари Антуанеттагаас бүтээлч санаа авсан дүр бүтээсэн байлаа.