Хэллоуин 2021: Алдартнуудын шилдэг дүр хувиргалтууд

Йода, Бритни Спирс, Дороти Гейл болон бусад

Жил бүрийн аравдугаар сарын сүүлийн өдрүүдэд алдартнууд айдас төрүүлэм, дурсамж сэргээсэн эсвэл инээд дагуулсан төрхүүдээ харуулдаг уламжлалтай билээ. Тэд энэ удаагийн Хэллоуины баяраар ч мөн бүтээлч сэтгэлгээгээ уралдуулан маш олон сонирхолтой төрхийг бүтээжээ. Мөн яг л таамаглаж байсны дагуу "Squid Game" цувралын робот охин болон тоглогчдын дүрүүд хамгийн түгээмэл байлаа. Харин Tyga, Хэйли Бибер, Doja Cat нар Бритни Спирс, Сара Беллум, Барнабас Коллинз зэрэг хамгийн олон давтагддаг ч хэзээ ч хуучирч, үнэ цэнээ алддаггүй дүрүүдийг сонгожээ. Мөн өвөрмөц төрхөөрөө олныг гайхшруулж, сонгосон дүрдээ бүрэн ордог модель, жүжигчин Хайди Клум энэ удаад долоон минут үргэлжлэх богино хэмжээний аймшгийн киног хүргэж босгыг улам дээшлүүлээд авлаа. Тэдгээрээс гадна хүйсгүй хувцаслалтыг дэмждэг Харри Стайлс Хэллоуинаар ч гэсэн баримталдаг зарчимдаа үнэнч байж "The Wizard of Oz” киноны Дороти Гейлийн дүрд хувирсан байна.