Спортлог кутюр

Чөлөөт, спортлог загваруудыг Nike, Adidas зэрэг брэндүүдээс л олох боломжтой гэдэг ойлголт ард хоцорч, алдартай загварын орднууд атлетик загваруудаа санал болгоод багагүй хугацаа өнгөрчээ. Үүний ачаар спортлог хувцаслалт онцлох street style төрхөөр тодорч, “спортлог кутюр” гэх стиль шинээр мэндэллээ.

Ретро

Ретро силуэтүүд загварын тайз төдийгүй гудамжинд ихээхэн үзэгдэж, тренд хэвээр байна. "Houndstooth" буюу шотланд маягийн хээтэй хүрэм, завсрын өнгийн ноолууран юбка, дөрвөлжин хоншоортой гутал зэрэг нь ретро төрхийг хялбар бүрдүүлэхэд туслах ба дээр нь сүүлийн үеийн “It” загварын гар цүнхний тусламжтайгаар модерн уур амьсгал нэмээрэй.

Гялалзсан загвар

Нью-Йоркийн загварын долоо хоног дээр Кендалл Женнерийн бүрдүүлсэн street style төрх олон зурагчдын анхаарлыг татсан юм. Бага зэрэг гэрэлтэж харагдах, уналттай ноолууран даашинз, мөнгөлөг цүнх гээд даруухан атлаа шик хувцаслалт гялалзсан, мөнгөлөг өнгө тренд хэвээр үлдсэн гэдгийг санууллаа.

Карго өмд

Карго загварын өмд хэсэгтээ л онцлох загварын нэг байх бололтой. Гэхдээ өндөр өсгийт, корсет зэрэг загваруудтай хослуулж илүү эмэгтэйлэг байдлаар загварчлаарай.

Орчин цагийн бохо бүсгүй

Бохо стиль бүрдүүлэхэд заавал хипстер хүрэм, цэцгэн хээ, цацагтай даашинз хэрэггүй ажээ. Харин өвөрмөц хийцийн зүймэл хүрэм, ковбой гутал, сийрсэн цүнх гээд улирлын хит загваруудыг хослуулан орчин цагийн бохо-шик төрх үүсгээрэй.

Савхин юбка

90-ээд оны хит загварууд болох савхин пиджак, савхин өмднүүд эргэн моданд ороод байгаа билээ. Тэдгээрийн нэг болох савхин юбка ч бас энэ улирлын онцлох загварын нэгээр тодроод байна. Хувцаслалтад тань ажил хэрэгч, хүчирхэг өнгө аяс нэмэх савхин юбка нь шүүгээнд зайлшгүй байх загваруудын нэг бөгөөд бусад хувцастай хялбар хослуулж болдог давуу талтай.

Oversize загвартай хүрэм

Намрын улирлыг хүрэмгүйгээр төсөөлшгүй. Харин энэ улиралд oversize загварууд анхааралд илүү өртөөд байна. Oversize хүрмийг зузаан ултай лоафер гутал, брюк өмд, сорочкатай хослуулаад л загварлаг төрхийг хялбар аргаар бүрдүүлээрэй.

Мини юбка

Эмэгтэй хүн бүрийн шүүгээнд мини юбка байдаг гэхэд хилсдэхгүй болов уу. Гэхдээ энэ улиралд дизайнерууд хуниастай, давхар хормойтой, цувны материалаар урласан гээд мини юбкаг олон хувилбараар танилцуулж байгаа нь анхаарлын төвд эргэн орох шалтгаан боллоо.

Классик төрх

Энгийн атлаа загварын торгон мэдрэмжийг илтгэх хувцаслалтууд загварын долоо хоногийн зочдын дунд ихээр үзэгдлээ. Тухайлбал, ноолууран цамц, өвдөг давсан урттай шулуун юбка, хар өнгийн углааш, арьсан гар цүнх гээд цаг үргэлжид үнэ цэнтэй байх загваруудыг сонгон хувцаслажээ.