Коллин Хуверын Verity зохиолоос сэдэвлэсэн кинонд тоглох жүжигчид зарлагдлаа
It Ends with Us, Confess, Layla, Regretting You зэрэг романтик зохиолуудаараа алдартай зохиолч Коллин Хувер 2018 онд триллер жанрын Verity хэмээх бүтээлээ уншигчдын хүртээл болгож байсан. Тус ном нь худалдаанд гарсан даруйдаа The New York Times-ийн бестселлер бүтээлүүдийн нэг болж чадсан бөгөөд улмаар бүрэн хэмжээний кино нь хийгдэхээр болсон билээ.
Тэгвэл Verity киноны гол дүрүүдэд жүжигчин Энн Хэтэуэй, Дакота Жонсон болон Жош Хартнетт нар тоглохоор болсон гэдгийг кино багынхны зүгээс албан ёсоор мэдэгджээ. Киноны найруулагчаар The Idea of You, Spoiler Alert зэрэг романтик бүтээлүүдээрээ танигдсан Майкл Шоуолтер ажиллахаар болсон байна.
Харин киноны үйл явдалд Лоуэн (Дакота Жонсон) хэмээх олонд танигдаагүй, жирийн нэг зохиолч бүсгүйд бестселлер номын зохиолч Верити Кроуфордын (Энн Хэтэуэй) дуусгаагүй орхисон ном дээр ажиллах санал ирнэ. Лоуэн саналыг зөвшөөрч, Веритигийн бичсэн зохиолын ноорог хуудаснуудыг унших явцдаа түүний гэр бүлийн тухай аймшигтай, сэтгэл сэртхийлгэм нууцыг олж мэдсэнээр кино цааш өрнөх аж.
Сонирхуулахад, өнгөрсөн жил зохиолч Коллин Хуверын It Ends with Us номоос сэдэвлэсэн ижил нэрт кино нээлтээ хийж, box оffice-ыг тэргүүлэн нийтдээ 351 сая ам.долларыг олсон юм. Иймд үзэгчид төдийгүй кино шүүмжлэгчдийн дунд Verity кино маш өндөр хүлээлттэй байгаа гэнэ.
