Squid Game 2, Dexter: Original Sin ба бусад: Энэ сард нээлтээ хийж буй 6 цуврал
Арванхоёрдугаар сар үзэгчдийн сэтгэлд тодхон үлдэх нь гарцаагүй биз ээ. Учир нь кино сонирхогчдын дунд хамгийн өндөр хүлээлт үүсгээд байгаа адал явдалт, инээдмийн, уран зөгнөлт жанрын цувралууд энэ сард нээлтээ хийж байна. Ингээд шинэ жилийнхээ бэлтгэл ажлын дундуур үзэж болох зургаан бүтээлийг танилцуулъя.
Star Wars: Skeleton Crew
Нээлтээ хийх өдөр: Арванхоёрдугаар сарын 3
Хаанаас үзэх: Disney+
Disney+ платформын Star Wars цувралын шинэ спин-офф арванхоёрдугаар сарын 3-ны өдөр нээлтээ хийжээ. Тус бүтээлийн найруулагчаар Жонн Уоттс, Кристофер Форд нар ажилласан бол гол дүрд Жуд Лоу тоглосон байна. Мөн жүжигчдийн бүрэлдэхүүнд залуу жүжигчид болох Рави Кэбот, Райан Кира Армстронг, Карина Крэттэр, Роберт Тимоти Смит багтжээ.
Киноны гол баатар Жод На Навуд Галактикт төөрсөн бүлэг хүүхдүүдэд тусалснаар үйл явдал өрнөнө. Тэд хамтдаа олон сорилтыг даван туулсны эцэст гэртээ эргэн ирнэ. Lucasfilm кино студийн мэдэгдлээр энэхүү киног үзэх томоохон шалтгааны нэг бол 1980-аад оны Стивен Спилбергийн кинонуудын уур амьсгалыг санагдуулна гэжээ. Уг бүтээл нь баярын уур амьсгалтай төгс нийцэж, үзэгчдийн таашаалыг хүртэнэ хэмээн таамаглаж байна.
Black Doves
Нээлтээ хийх өдөр: Арванхоёрдугаар сарын 5
Хаанаас үзэх: Netflix
Цувралыг заавал үзэх эхний шалтгаан бол гол дүрийн жүжигчин Кира Найтли юм. Тэрээр энэ удаа түүхэн дүрд тоглоогүй, түүний хэв маяг болсон урт романы хэллэгээр ч яриагүй, энэ бол түүний тэс өөр ертөнц. Жүжигчин бүсгүй сайн ээж, улс төрчийн гэргий Хелен Уэббийн дүрд тогложээ. Хеллен чөлөөт цагаараа тагнуулын ажил эрхэлдэг. Тэрээр олон жилийн турш “”Black Doves” гэх нууц байгууллагад ажиллаж байсан ба нөхрийнхөө бүхий л зүйлийн талаар мэдээлэлдэг байв. Гэвч гэнэт нэг өдөр түүний “төгс” бүтээсэн схемд алдаа гарч, Хелен нууц амрагийн харилцаа үүсгэснээр төсөөлөхийн аргагүй үр дүнд хүргэнэ. Цувралын бас нэгэн гол дүрийг алдарт жүжигчин Бен Уишоу бүтээжээ.
No Good Deed
Нээлтээ хийх өдөр: Арванхоёрдугаар сарын 12
Хаанаас үзэх: Netflix
Инээдмийн цуврал киноны гол үйл явдал 1920 онд баригдсан үл хөдлөх хөрөнгө худалдан авахаар хоорондоо өрсөлдөж буй гурван гэр бүлийн талаар өгүүлнэ. Бие давхар Карла болон түүний нөхөр Денис, Лесли болон Сара, амжилтгүй жүжигчин Жей Ди болон Кэмпбелл нар бие биеэсээ өрсөхийн тулд юу ч хийхэд бэлэн байдаг. Гэвч хаалганы цаана юу нуугдаж байгааг тэд огтхон ч төсөөлөөгүй. Киноны найруулагчаар Лиз Фельдман ажилласан бол гол дүрд Рэй Романо, Лиза Кудроу, Линда Карделлини, Эбби Жейкобсон, Денис Лири, Поппи Лю, Тейона Паррис тогложээ.
Dexter: Original Sin
Нээлтээ хийх өдөр: Арванхоёрдугаар сарын 15
Хаанаас үзэх: Showtime
Арванхоёрдугаар сарын 15-ны өдөр Жеффри Линсейны Darkly Dreaming Dexter романаас сэдэвлэн бүтээсэн Dexter: Original Sin цуврал нээлтээ хийнэ. Энэхүү бүтээл нь шүүх эмнэлгийн шинжээчээр ажилладаг цуврал алуурчны тухай өгүүлдэг Dexter цувралын үйл явдлаас 15 жилийн өмнөх түүхийг харуулна. Харри Морган цагдаагийн хүн амины хэргийн хэлтэст мөрдөгчөөр ажиллахын сацуу Декстер болон Дебра нарыг өсгөдөг. Харри энэ үеэр Декстерийн дотор оршиж буй алуурчны шинж чанарыг олж харна.
Laid
Нээлтээ хийх өдөр: Арванхоёрдугаар сарын 19
Хаанаас үзэх: Peacock
Киноны гол дүр Рубигийн дурлалт залуус түүнд ухаангүй дурлаж, бүхнээ зориулахад бэлэн байх хэдий ч удалгүй нууцлаг шалтгааны улмаас нас бардаг. Руби ямар шалтгааны улмаас тэдгээр залуус нас бараад буй шалтгааныг олохыг хичээнэ. Түүнд туслахаар найз Эй Жэй, ах Жейсон, Ричи нар нь ирнэ. Тус инээдмийн кино 2011-2012 оны хооронд гарч байсан Австралийн ижил нэртэй цуврал кинон дээр үндэслэн бүтээгдсэн бөгөөд үзэгчдэд хөгжилтэй, нууцлаг, сонирхол татахуйц явдлыг харуулдаг.
Squid Game 2
Нээлтээ хийх өдөр: Арванхоёрдугаар сарын 26
Хаанаас үзэх: Netflix
Энэ сар төдийгүй энэ жилийн хамгийн их хүлээлт үүсгээд буй цуврал кино 26-ны өдөр нээлтээ хийх гэж байна. Эргэн сануулахад, 1,65 тэрбум үзэгчтэй Squid Game цувралын эхний бүлэг Netflix-ийн хамгийн алдартай бүтээл болсон билээ. Уг цуврал дээр Азийн анхны Эмми шагналт найруулагч Хван Дун Хёг, жүжигчин И Жун Жэ нар дахин ажилласан байна.
Тоглогч энэ удаад хүмүүст туслах зорилгоор эргэн ирэхээр шийднэ. 456 дугаартай оролцогч бусад хүмүүсийг тоглоомд оролцохоос татгалзахыг ятгаж, шоуг зохион байгуулагчдыг ил болгохыг оролдох болно. Гэвч тэрээр тус тоглоомыг дуусгавар болгохын тулд дахин эхнээс нь тоглох ёстой гэдгийг огтхон ч гадарладаггүй. Дашрамд дурдахад, Squid Game цувралын гуравдугаар бүлэг 2025 онд гарах бөгөөд энэ нь тус цувралын сүүлийн бүлэг байх болно хэмээн зарласан байна.
