Мортиша Аддамсд дуртай хүн бүрд таалагдах Rodarte брэндийн готик цуглуулга

Урт үс, цагаан царайтай, бараан өнгийн контураар нүдээ будаж тас хар даашинзаар гоёсон моделиуд Rodarte-гийн тайзнаа алхацгаана. Шоун дээр зонхилох готик хэв маягийг брэндийн бүтээлч захирлууд болох Кэйт Маллеви, Лаура Маллеви нар гарамгай бүтээж, цуглуулгад багтсан загваруудыг яг л Мортиша Аддамсын хувцасны шүүгээнээс авсан мэт сэтгэгдэл төрүүлж чадлаа.

Дизайнерууд намар-өвөл 2023 цуглуулга дээр өнгөрсөн жилийн дөрөвдүгээр сараас эхлэн ажилласан бөгөөд ээжийнхээ зурсан сахиусан тэнгэрийн зургаас сэдэл аван бүтээжээ. Санаагаа баяжуулах явцдаа тэд даашинз дээр дүрсэлсэн хээний зохиомжийг хамгийн их цаг зарцуулан гаргасан байна. Үүнээс гадна дизайнер Лаура дотроо төсөөлсөн бодлоо нэг ч зөрүү болон алдаа дутагдалгүйгээр биет болгоход асар их хүч хөдөлмөр зарлагдсан гэдгээ хуваалцсан бөгөөд загварын шоуг нэг ч алдах эрхгүй театрын үзүүлбэртэй жишин зүйрлэсэн юм.

Танилцуулсан загваруудыг агуулж буй хэв маягт нь тулгуурлан хоёр хэсэгт хуваах боломжтой. Тайзан дээр гарсан төрхүүдийн тэн хагас нь тас хар өнгийн готик хэв маягтай бол үлдсэн хэсгийг бүтээлч захирлууд маш өнгөлгөөр дүрслэн харуулжээ. Мөн гүн ухлаадас бүхий V энгэр, трапец хэлбэрийн шал шүргэх урт ханцуй, алхах тоолонд солонгорон харагдах цацган оруулга нь энэ цуглуулгын таних тэмдэг болоо.