Сансар огторгуй, зурхай болон диваажин: Fendi брэндийн хавар-зун 2022 кутюр цуглуулга

Fendi ордны бүтээлч захирал Ким Жонс гурав дах кутюр цуглуулгаа өчигдөр буюу нэгдүгээр сарын 27-ны өдөр Парисын загварын долоо хоног дээр толилууллаа. Тэрээр энэ удаад ч бас Ром хотоос урам зориг авч, шинэ загваруудаа урласан байна. “Ром хотод өөрийн эрхгүй өнгөрсөн, одоо болон ирээдүйн талаар бодогддог. Энэхүү хотод сүнслэг, бодит биш тийм нэгэн онцгой зүйл шингэсэн байдаг” хэмээн Ким Жонс Fendi ордны төрөлх хотын талаар дурджээ.

Ром хотын тэрхүү сүр жавхлант байдал нь кутюр цуглуулгын хамба хилэн материалтай багана мэт даашинзууд, эртний хөшөөний дүрстэй нөмрөгүүд болон Ромын Папын өмсгөлийг санагдуулам дэгжин загваруудад шингэсэн харагдлаа. Харин өнгөний хувьд классик хар, ариун цэвэр байдлыг илтгэдэг цагаан, нил ягаан, улаан зэрэг өнгөнүүд давамгайлсан байна. Мөн тайзнаа алхсан моделиуд минимал хийцийн аксесуаруудаар төрхөө бүрдүүлснээр зочдын анхаарал цуглуулгын гоёмсог загваруудад илүү төвлөрч чадсан юм.