ГОВЬ Монголын загварын шоуны салбарт жишиг тогтоолоо: Арга хэмжээ хэрхэн болж өнгөрөв?
Дэлхийн шилдэг Dior, Giorgio Armani, Louis Vuitton, Max Mara, Chanel, Brunello Cucinelli, Alexander Wang, Moncler, Zegna гэх загварын ордонтой хамтран ажиллаж байсан туршлагатай Италийн загвар зохион бүтээгч Жиоржио Спина ГОВЬ-ийн ерөнхий дизайнерын албыг саяхнаас хашиж эхэлсэн юм. Энэхүү үүргийг хүлээн авснаас хойших түүний дебют цуглуулгыг танилцуулсан загварын шоу өчигдөр буюу 2023 оны зургаадугаар сарын 8-ны өдөр амжилттай болж өнгөрлөө. Арга хэмжээ Чойжин ламын сүм музейд зохион байгуулагдсан бөгөөд монгол ноолуур, Итали ур ухаан, орчин үеийн загварын хэв маяг 100 гаруй жилээс улбаатай түүхэн дурсгалт газар огтлолцсон билээ.
Арга хэмжээ эхлэх цаг ойртож Чойжин ламын сүм музей рүү дөхөн очиход юун түрүүнд электроник урсгалын тусгай DJ сет зочдыг угтан авсан юм. Үүднээсээ л эхлэн загварын шоуны уур амьсгал байгаль орчноос ихээхэн сэдэлтэй гэдэг нь мэдэгдэнэ. Тухайлбал, хаалганы хоёр талд органик ноолуурыг санагдуулам саарал, бор өнгөтэй “MATERIA”, “THE FACE” хэмээн цуглуулгын нэрийг тус тус бичсэн хана байршжээ. Мөн музейн урд талбайд төрөл бүрийн ургамлаар чимэглэсэн ГОВЬ-ийн логог дүрсэлсэн инсталляци бүтээл сүндэрлэж байв. Энэ бол зочдыг хүлээн авч, гэрэл зургаа камерын дуранд буулгах зорилготой угталтын хэсэг юм.
Цааш нэвтрэн ороход networking area буюу хоорондоо харилцаа холбоо тогтоож ,чөлөөтэй ярилцан, орчинтойгоо танилцах хэсэгт ирлээ. Тэндээс тус загварын шоунд олон улсын томоохон компаниудын төлөөллүүд болон урлаг, загварын салбарын нөлөө бүхий эрхмүүд хуран цугларсан нь харагдсан юм. Хүмүүс яриа өрнүүлэхийн сацуу талбайн зүүн талд байрлах “experience zone” хэсгээр уриалгахан зочилж байв. Би ч мөн зорин очиход хананд дүрслэгдсэн ГОВЬ-ийн түүхэн товчоон юун түрүүнд анхаарал татлаа. Хүнээр бол өдгөө 42 настай тэрбээр түүхийнхээ нэн ач холбогдолтой хуудсыг нээж буй нь энэ мэт санагдсан юм. Үүнээс гадна шинэ цуглуулгад орсон хээ угалз, өнгө болон ашигласан арга техникийн талаар хананд өлгөгдсөн дээжис материалаас харж, мөн хүрч үзэн мэдрэх боломжтой байлаа. Загварын шоу үзэж байхад бишгүй төрдөг хүрээд нэг үзчих юм сан гэх хүслийг тус хэсэгт урьдчилан гүйцэлдүүлэх боломжийг хуваарилж өгчээ.
Төд удалгүй арга хэмжээний оргил хэсэг загварын шоу эхлэхэд бэлэн болж зочид музейн хойд хэсгийг зүглэн байраа эзлэн суулаа. Монголд загварын шоунууд ихэвчлэн олон арван урлагийн номер, хөтлөгчийн хамт явагддаг бол ГОВЬ энэ бүгдийг алгасаж олон улсын жишигт нийцсэн runway туршлагыг мэдрүүлэхээр зорьжээ. Үүний тулд тэд шоуны амин сүнс болох шинэ цуглуулгыг анхаарлын гол төв болгон тодотгов.
Ерөнхий дизайнер Жиоржио Спинагийн хувьд оёмол болон сүлжмэл арга техникийг нэг загвар дээр давхар оруулснаараа энэ удаагийн цуглуулга онцлог болжээ. Тэрээр бид бүхнийг хүрээлэн буй байгаль дэлхий, тэнд сийлэгдсэн хээ, угалз, ширхэг бүрээс загваруудынхаа сэдлийг авч, ноолуурын утсанд мөнхөлсөн байна. Ингэхдээ шинэ төрлийн сүлжээс, нэхээсийг ч мөн нэвтрүүлжээ.
“Сүлжмэл загвар нь гоо зүйн өндөр мэдрэмж, нарийн сэтгэмж шаарддаг нэг төрлийн урлаг юм. Ноолууран хувцас энгийн нэг ширхэг утаснаас эхэлж хүний ур ухаан, хүсэл тэмүүллээр дамжсанаар бүрэн бүтэн болдог”.
Загварын шоу артист Bodikhuu-гийн эрч хүчтэй хэмнэл дээр эхэллээ. Арга хэмжээний эхний хагасад цайвар шаргал өнгийн загваруудаар монохром төрх бүрдүүлсэн моделиуд органик хэв маягийг мэдрүүлэн цувран алхацгаалаа. Макси урттай юбка, дан энгэртэй пиджак, лаунж хослол зэрэг бидний үзэж дассан ГОВЬ-ийн загваруудаас гадна сул силуэттэй макси юбка, бор цоохор хээ, гар аргаар урласан хурганы арьс мэт харагдах ноолууран сүлжээсэн оруулгатай гарын гидр, бүч нь ороолт болдог давхар зориулалттай загасчны стилийн малгай зэргүүд шинэ уур амьсгал мэдрүүлсэн юм.
Цаашлаад ханцуйны загварт ач холбогдол өгсөн rustic хэв маягтай цамцнууд, мөн 2023 оны чиг хандлагын эгнээнд багтаж буй oversize цүнхнүүдийг танилцуулсан билээ. Шоуны сүүл хэсгээр гарсан оливын ногоон өнгөтэй өмд, хантааз, хурганы арьс мэт сүлжээстэй ноолууран деталиуд шинэ үеийнхний дурлаж буй гранж стилийг үл ялиг санагдуулна. Цайвар шаргал сонгодог төрхөөр эхэлсэн шоу маань тодорсоор тодорсоор эцэс сүүлдээ дүрэлзсэн улаан болон тас хар хосолсон онцлох загваруудаар өнөөдрийн гол арга хэмжээнд цэг тавьсан юм. Ийнхүү Жиоржио Спинагийн урласан 25 нэр төрлийн 100 гаруй загвар олон нийтийн өмнө дэлгэгдэж дууслаа. Шоуны төгсгөлд моделиуд урсан алхацгааж Чойжин ламын сүм музейн өмнө тусгайлан зассан тайзны голд эгнэн зогсох нь контемпорари загвар, ноолуураар тодорхойлогдог монгол соёлын өв, Итали дизайнерын гоо зүй, поп соёлыг нэгтгэсэн ховорхон тохиолыг ахин дахин сануулсан билээ.
