Tiffany & Co. болон Nike брэнд нар хамтрах болсон нь албан ёсоор батлагдлаа
Tiffany цэнхэр өнгийн пүүз угтан авахад бэлэн үү?
Nike брэндийн томоохон загварын орднуудтай хийсэн хамтын ажиллагаа бүр амжилт олж чаддаг. Тэд Louis Vuitton, Supreme, Carhartt, Sacai, Off-White, Jacquemus, Ambush, Comme des Garçons зэрэг брэндүүдтэй хамтран шинэ цуглуулга толилуулан олны дунд өндөр хайп үүсгэж байсан. Тэгвэл Nike дараагийн түншлэлээ тансаг зэрэглэлийн үнэт эдлэлийн Tiffany & Co. брэндтэй хийхээр болсон нь ил болоод байна.
Албан ёсны мэдэгдлийг хоёр брэнд өөрсдийн Instagram хуудсаар дамжуулан гаргасан ба “A Legendary Pair” буюу “Домогт хос” хэмээх гарчигтай Tiffany цэнхэр өнгийн Nike-гийн пүүзний хайрцаг дүрсэлсэн зураг хуваалцсан юм.
Сонирхуулахад, Nike болон Tiffany & Co. брэндүүдийн хамтын ажиллагааны талаарх цуу яриа өнгөрсөн долоо хоногт цахим орчинд тэдний гаргасан байж болзошгүй Air Force 1 Low пүүзний зураг цацагдсанаар дэгдсэн билээ. Тус пүүзний их бие нь хар, харин хоёр талд байрлах Nike-гийн лого Tiffany цэнхэр өнгөтэй харагдана. Олонд ил болсон энэхүү зураг шинэ цуглуулгын нэг хэсэг мөн эсэх нь албан ёсоор батлагдаагүй байна.
