Энэ онд адал явдал, инээд хөөр, хайр дурлал, триллер гэхчлэн төрөл бүрийн жанрын олон бүтээл нээлтээ хийхээр товлогдоод байна. Тэр дундаа үзэгчид болон кино шүүмжлэгчдээс өндөр үнэлгээ авсан хэд хэдэн цувралын шинэ бүлэг цацагдахаар болж кино сонирхогчдыг уйдах завгүй байлгах нь ээ. Иймд бид үзэгчдийн дунд хамгийн өндөр хүлээлттэй байгаа зургаан цувралыг онцлон танилцуулж байна.

Newtopia 

Цацагдах огноо: 2025 оны хоёрдугаар сарын 7

BLACKPINK хамтлагийн Жисү болон жүжигчин Пак Жон Мин нарын хамтран тоглосон романтик, инээдмийн жанрын тус цувралыг Influenza хэмээх webtoon-ээс (Өмнөд Солонгосын дижитал комикс) сэдэвлэн бүтээжээ. Энэхүү цувралын зохиолчийн үүргийг Parasite кинонд ажилласан Хан Жин Вон гүйцэтгэсэн нь үзэгчдийн дунд багагүй хүлээлт үүсгээд байгаа юм. 

Үйл явдал И Жэ Юүн хэмээх нэгэн цэрэг залуу найз охиноосоо салж буйгаар эхэлнэ. Гэвч тэдний салсан өдөр Өмнөд Солонгос улсад үл мэдэгдэх вирусийн гаралтай өвчин тархаж, улмаар хүмүүс зомби болж хувирснаар цуврал цааш үргэлжлэх аж. 

The Last Of Us 2 

Цацагдах огноо: 2025 оны дөрөвдүгээр сар

Ижил нэрт адал явдалт аймшгийн видео тоглоомоос сэдэвлэсэн тус цувралын эхний бүлэг нь цацагдсан даруйдаа үзэгчдийн дунд тэсрэлт хийсэн билээ. Видео тоглоомынхоо үйл явцтай тун төстэй хийгдсэн энэхүү бүтээл нь тоглоомын үнэнч шүтэн бишрэгчид төдийгүй кино шүүмжлэгчдээс багагүй сайшаал хүртсэн бөгөөд яг одоогоор Rotten Tomatoes вэбсайт дээр 96%-ийн үнэлгээтэй яваа юм. Тэгвэл хэдхэн хоногийн өмнө HBO Max-ын зүгээс The Last Of Us цувралын хоёрдугаар бүлэг энэ оны дөрөвдүгээр сард цацагдах болно гэдгийг мэдээлсэн байна. 

Хоёрдугаар бүлгийн хувьд 2020 онд гарсан The Last of Us Part II  видео тоглоомын үйл явдалтай ижилхэн байх боловч кино багынхны зүгээс зарим түүхийг өөрчилж, арай өөр өнцгөөс харуулах гэж хичээсэн хэмээн мэдэгджээ. 

Squid Game 3 

Цацагдах огноо: 2025 он

Чадварлаг жүжигчид, сонирхолтой зохиол хосолсон тус цувралын хоёрдугаар бүлэг цацагдсан эхний 11 хоногтоо 126.2 саяын үзэлт цуглуулсан байна. Ингэснээр Squid Game цувралын хоёрдугаар бүлэг Netflix-ийн түүхэн дэх хамгийн богино хугацаанд хамгийн их үзэлт цуглуулсан бүтээл болж, гайхалтай амжилтыг үзүүлжээ. Гэвч цувралын төгсгөлд маш олон ээдрээтэй асуудлын зангилаа тайлагдаагүй үлдсэн учир кино сонирхогчдын дунд дахин өндөр хүлээлт бий болж, тэд цувралын өрнөлтэй холбоотой олон янзын таамаг дэвшүүлэн шинэ бүлгийг хоног тоолон хүлээж буй. Тухайлбал жүжигчин Леонардо Дикаприо, BTS хамтлагийн V нар гуравдугаар бүлэг дээр дүр бүтээсэн гэх цуурхал гарсан ч кино багынхны зүгээс одоогоор ямар ч мэдээлэл өгөх боломжгүй хэмээн хариу өгчээ.

Харин цувралын найруулагч Хван Дун Хёг төгсгөлийн бүлгийн талаар "Шинэ бүлэг хоёрдугаар бүлгээс илүү сонирхолтой, үзүүштэй байх болно. Мөн оролцогчдыг таамаглашгүй, аюултай, хэрцгий тоглоомууд хүлээж байгаа" хэмээжээ. 

You 5 

Цацагдах огноо: 2025 он

Хайрын төлөө юу ч хийхээс буцахгүй дурламтгай, психопат залуугийн тухай өгүүлэх You цувралын төгсгөлийн бүлэг энэ онд цацагдахаар болжээ. Netflix-ийн хамгийн алдартай бүтээлүүдийн нэг болох энэхүү цувралын тавдугаар бүлэг нийт 10 ангитай байх ба үйл явдалд гол дүрийн баатар Жо Голдберг Нью-Йорк хот руу буцаж, өнгөрснөө мартан шинэ амьдрал эхлүүлэхээр зорих боловч эсрэгээрээ түүнд төсөөлшгүй, гэнэтийн асуудлууд үүссэнээр цуврал цааш үргэлжилнэ. 

Мөн цувралын гуравдугаар бүлэгт тоглосон жүжигчин Тати Габриэль сүүлийн бүлэгт дахин дүр бүтээх нь батлагдсан бол Pitch Perfect киногоороо алдартай жүжигчин Анна Кэмп болон зохиолч, найруулагч Гриффин Мэттьюс нар жүжигчдийн бүрэлдэхүүнд шинээр нэмэгдсэн байна. 

Black Mirror 7 

Цацагдах огноо: 2025 он

Анги тус бүр дээрээ сонирхолтой, жихүүдэс хүрэм өөр, өөр түүхийг өгүүлдэг Их Британийн алдарт Black Mirror цувралын долоодугаар бүлэг тун удахгүй үзэгчдийн хүртээл болоход бэлэн болжээ. Энэ удаагийн бүлэг нийт зургаан ангитай байх бөгөөд цувралын зохиолч Чарли Брукер "Шинэ бүлэгт хөгжилтэй, өрөвдөлтэй, аймшигтай гээд төрөл бүрийн жанрын ангиуд багтсан. Эдгээрээс хоёр нь бүрэн хэмжээний кино мэт хийгдсэн гэдгээрээ онцлог" хэмээн мэдэгджээ. 

Түүнчлэн Black Mirror цувралын дөрөвдүгээр бүлэгт багтсан USS Callister ангийн үргэлжлэл анги шинэ бүлэг дээр гарна гэдгийг кино багынхны зүгээс хуваалцсан байна. 

21st Century Prince's Wife

Цацагдах огноо: 2025 он

Дуучин, жүжигчин IU болон жүжигчин Бён Ү Сог нарын тоглосон энэхүү цувралд нэр хүнд, эрх мэдэл багатай хааны удмын угсаа залгамжлагч ханхүү Иан хэмээх залуу болон баян айлын өв залгамжлагч, хүйтэн сэтгэлт бүсгүй Сун Хи Жү нарын хайрын түүхийг өгүүлэх аж. 

Жүжигчин Бён Ү Сог нь өнгөрсөн жил цацагдсан Lovely Runner цувралаараа олонд танигдаж, үзэгчдийн хайр хүндэтгэлийг хүлээж чадсан учир тус цувралыг хүлээж буй үзэгчид цөөнгүй байгаа гэнэ. Түүнчлэн IU болон Бён Ү Сог нар 2016 онд Moon Lovers: Scarlet Heart Ryeo цувралд тоглож байсан ба тэд есөн жилийн дараа дахин нэг төсөл дээр хамтдаа ажиллаж байгаа нь олон нийтийн дунд улам өндөр хүлээлтийг үүсгэж эхэлжээ.