Хэдхэн хоногийн өмнө кино болон телевизийн салбарын шилдгүүдийг тодруулдаг Алтан Бөмбөрцөг 2025 наадмын нэр дэвшигчдийн жагсаалтыг зарласан билээ. Энэ жилийн наадамд үзэгчид төдийгүй кино шүүмжлэгчдээс өндөр үнэлгээ авсан олон чанартай бүтээлүүд нэр дэвшээд буй бөгөөд тэр хэрээрээ наадам багагүй өрсөлдөөнтэй байгаа юм. Тухайлбал Селена Гомес, Зоуи Салдана нарын тоглосон Emilia Pérez кино хамгийн олон төрөлд буюу нийт 10 номинацид нэр дэвшиж жагсаалтыг тэргүүлсэн бол The Brutalist, The Bear бүтээлүүд чамгүй амжилтыг тогтоон, нэр дэвшсэн тоогоороо Emilia Pérez киноны ард жагсжээ.

Иймд бидний зүгээс 2025 оны нэгдүгээр сарын 6-нд зохиогдох 82 дахь удаагийн Алтан Бөмбөрцөг кино наадмаас өмнө урьтаж үзэх хэрэгтэй таван бүтээлийг онцлон танилцуулж байна.

The Substance

Жүжигчин Деми Мур болон Маргарет Куолли нарын тоглосон тус кино нь Алтан Бөмбөрцөг кино наадмын гол таван төрөлд нэр дэвшээд байгаа билээ. Нүд халтирам, сэтгэл сэртхийлгэм үзэгдэл ихтэй, body horror жанрын уг кино нь үзэгчид болон кино шүүмжлэгчдээс нэлээдгүй сайшаал хүртээд зогсохгүй Rotten Tomatoes вэбсайт дээр 90%-ийн үнэлгээтэй байгаа юм. 

Үйл явдал телевизийн салбарт нэр хүндтэй жүжигчин Элизабет Спаркл 50 насныхаа төрсөн өдрөөр ажлаасаа халагдаж буйгаар эхэлнэ. Ийнхүү урлагийн салбараас бага багаар арчигдаж буйгаа мэдэрсэн бүсгүй сэтгэлээр унаж, автомашины осолд ордог. Харин эмнэлэгт сэрэхэд Элизабетэд "Өөрийгөө илүү залуу, үзэсгэлэнтэй, төгс болгохыг хүсэж байна уу?" гэсэн агуулгатай нууцлаг саналыг нэгэн сувилагч тавина. Гэвч тэрхүү хачирхалтай санал нь бүсгүйн амьдралыг аажим, аажмаар сүйрүүлж эхэлснээр кино цааш өрнөнө.

Shōgun

Зохиолч Жеймс Клавеллын ижил нэрт романаас сэдэвлэн бүтээсэн тус цуврал нь Алтан Бөмбөрцөг кино наадамд шилдэг уянгын цуврал, уянгын цувралын шилдэг эрэгтэй жүжигчин зэрэг гол дөрвөн шагналд нэр дэвшээд байгаа юм. Өмнө нь Shōgun цуврал нь 76 дахь удаагийн Эмми шагнал гардуулах ёслолд 25 номинацид нэр дэвшиж, дөрвийг нь өөрийн болгосон түүхтэй учир олон нийт тус бүтээлийг нэр дэвшсэн төрөл бүртээ амжилт гаргах байх хэмээн таамаглаж байна. 

Үйл явдалд 17 дугаар зууны феодалын нийгмийн үеийн Япон орны үймээн самуунтай он цагийг харуулах бөгөөд нэр хүндтэй самурай дайчин болон түүнд захирагдах болсон Британийн далайчин хоёрын түүхийг өгүүлдэг билээ. Сонирхуулахад, гол дүрийг бүтээсэн 64 настай жүжигчин Санада Хироюүки нь эрсдэл өндөртэй тулааны хэсгүүдэд ямар ч орлон тоглогчгүй тоглосон байна. 

The Brutalist

American Film Institute-ээс жил бүр тодруулдаг Оны шилдэг 10 кино жагсаалтад багтаж чадсан The Brutalist бүтээл нь 81 дэх удаагийн Каннын кино наадамд нээлтээ хийж, шилдэг найруулагч төрөлд Мөнгөн Арслан хэмээх хүндэт шагналыг хүртсэн. Харин тус кино нь Алтан Бөмбөрцөг кино наадамд нийт долоон төрөлд өрсөлдөж байгаа бөгөөд гол дүрийг бүтээсэн жүжигчин Адриен Броуди уянгын киноны шилдэг эрэгтэй жүжигчин номинацид хүч үзэхээр болсон байна. 

Энэхүү кинонд Унгар-Еврей гаралтай нэгэн Ласло Тот хэмээх архитектор залуугийн тухай өгүүлэх бөгөөд үйл явдал Дэлхийн хоёрдугаар дайны дараах үед өрнөнө. Ласло Тот дайны улмаас эхнэр хүүхдээсээ салан одож, Америк руу дүрвэх шаардлагатай болно. Танихгүй газар ирсэн тэрээр өөрийн мэргэжлийн ур чадварыг ашиглан амьдрахыг хичээх боловч түүний санаснаар бүтэх нь ховор. Олон бартаат замыг туулсны эцэст тэрээр нэгэн чинээлэг эрхэмтэй танилцсанаар кино цааш үргэлжилнэ. 

Emilia Pérez

Наадмын хамгийн олон төрөлд нэр дэвшээд буй мюзикл жанрын тус бүтээлд Мексикийн хар тамхины бүлгийн толгойлогч байр сууриасаа татгалзаж, хүйсээ солиулан эмэгтэй хүн болох мөрөөдлөө биелүүлэхийн тулд өмгөөлөгч бүсгүй Ритатай холбогдож буй талаар өгүүлдэг. Чадварлаг өмгөөлөгч бүсгүйн дүрийг жүжигчин Зоуи Салдана, томоохон бүлэглэлийн толгойлогчийн дүрд испани жүжигчин Карла Софиа Гаскон тогложээ. Харин киноны гол зангилаа болох толгойлогчийн эхнэрийн дүрийг дуучин, жүжигчин Селена Гомес бүтээсэн байна. 

Тус кино нь мөн адил Каннын наадамд нээлтээ хийж үзэгчдээс өндөр үнэлгээ авсан билээ. Иймд кино шүүмжлэгчид Emilia Pérez бүтээлийг ирэх оны Оскарын шагналд хэд, хэдэн чухал номинацид нэр дэвшиж магадгүй хэмээн таамаглаж байгаа гэнэ. 

The Penguin

"Энэ онд гарсан хамгийн шилдэг цуврал" гэгдээд буй Batman-ы хамгийн зальжин, ухаалаг дайснуудын нэг Penguin-ий тухай өгүүлэх The Penguin бүтээл Алтан Бөмбөрцөг кино наадмын гурван төрөлд нэр дэвшжээ. 

Энэхүү цувралд 2022 онд гарсан The Batman киноны үйл явдлын дараах түүхийг өгүүлэх бөгөөд Penguin хэрхэн жирийн нэг ажилчнаас Готам хот дахь хамгийн нөлөө бүхий хүмүүсийн нэг болж буйг сонирхолтой байдлаар харуулж өгчээ. Түүнчлэн 2025 онд гарах The Batman Part II кинонд The Penguin цувралд гарсан үйл явдлаас хойших он цагийг харуулахаар төлөвлөж байгаа учир тус цувралыг цаг алдалгүй үзээрэй!