Алдарт хээ угалз хувцас загварт: Loewe брэндийн капсул цуглуулга

Loewe брэндийн бүтээлч захирал Жонатан Андерсон алдарт уран бүтээлч, дизайнер Уильям Де Морганы уран бүтээлээс сэдэвлэсэн капсул цуглуулга танилцууллаа. Сонирхуулахад 1839-1917 оны хооронд аж төрж байсан Английн уран бүтээлч Уильям Де Морган нь гайхалтай уран хээ бүхий шаазан эдлэлүүдээрээ гайхагддаг нэгэн байсан юм. "Loewe урлаг ба гар урлалаас сэдэвлэсэн цуглуулгыг жил бүр танилцуулдаг уламжлалтай. Уильям Де Морганы бүтээлүүдээс сэдэвлэсэн цуглуулга бүтээх нь аль эртнээс л тодорхой байсан. Учир нь тэр бол гар урлалын салбар дахь гоц ухаантан билээ" хэмээн Жонатан Андерсон шинэ цуглуулгын тухай ярьсан ба шинэ цуглуулгадаа Морганы алдарт хээнүүдийг ашиглан, маш сонирхолтой загваруудыг оруулсан байна. Судалтай пончо, хээтэй задгай энгэртэй цамц, хүрэм, цацган чимэглэлтэй ноосон малгай, араатны сарвуу мэт харагдах ноосон бээлий зэрэг тод өнгө, олон төрлийн хээ зэргээр баяжуулсан загварууд капсул цуглуулгад багтжээ.