Сүүлийн хоёр улирлын турш дизайнерууд хувцас гэхээсээ илүү аксесуар дээр анхаарлаа төвлөрүүлж, улам бүр л этгээд шийдэлтэй загварууд гаргах боллоо. Өдөөр хийгдсэн зах, улаан эсвэл шар өнгийн линзтэй нарны шил, эртний уур амьсгалтай толгойн алчуур гээд байж болох бүхий л өвөрмөц аксесуарууд нэр хүндтэй дизайнер бүрийн шинэ цуглуулгад гол үүрэг гүйцэтгэж, хувцаснуудыг илүү сонирхолтой харагдуулахад тусалсан байна. Гар цүнхний хувьд ч бас нэгэн хэвийн байхаа больж, амьтдын хээтэй эсвэл хүүхэлдэйн дүр зураглалтай, ер бусын хэлбэртэй дизайнууд тайзнаа гарсан байгаа.