Интерьерийн сонирхолтой хоршил: Цагаан болон ногоон өнгө

Хэрэв та амар тайван орчныг бүдүүлэхэд түлхүү анхаарч байгаа бол интерьерийн шийдэлдээ зөөлөн ногоон болон цагаан цайвар өнгийг сонгоорой. Байгалиас сорчилсон энэ хоёр өнгөний хослол хүний сэтгэлзүйд эерэг нөлөө үзүүлэхийн сацуу эрүүл мэндэд хүртэл ач тусаа хүргэдэг байна. Энэхүү хоршил нь нарны туяа бага тусдаг гэрт өнгө нэмэхээс гадна хээнцэр хэв маяг бүрдүүлдэг онцлогтой бөгөөд хамгийн “уйтгартай” дотоод засалтай орчныг хүртэл сонирхолтой харагдуулна. Гэхдээ гэрийнхээ нэг өрөөг л тус аргаар зассан нь илүү зохимжтой гэдгийг анхааралдаа аваарай.

Мөн мэдээж энэ хослол нь цэвэр модон тавилга, амьд ургамал, цэцэгс, чулуу зэрэг байгалийн элементүүдтэй төгс зохицох тул гэр тань илүү онцгой уур амьсгалтай болох нь гарцаагүй. Ерөнхийдөө байгалийн өнгө төрхийг дотоод засалдаа шингээхийн тулд масс зах зээлд зориулсан декор, чимэглэлээс татгалзаж, хэзээд ч үнэ цэнтэй байх зүйлсээр эргэн тойрноо тохижуулан ухамсартай худалдан авалт хийх хэрэгтэй болохыг олон нэрт дизайнерууд онцолдог билээ.