Louis Vuitton загварын ордон Японы Осака хотод анхны кафе, ресторанаа нээлээ. Louis Vuitton-ы бүтик дотор байрлах тансаг зэрэглэлийн Sugalabo V ресторанд 32 удаагийн Мишлений одон хүртсэн зууны шилдэг тогооч хэмээгддэг Жоель Робюшоны шавь болох алдарт тогооч Ёсуке Сугагийн гарын зоогийг амтлах боломжтой юм. Sugalabo V нь тогооч Ёсуке Сугагийн Токио дахь ижил нэрт рестораны салбар бөгөөд зөвхөн оройн цагаар олон нийтэд үйлчилнэ гэдгийг брэндийн зүгээс онцолжээ. Түүнчлэн ресторанаар үйлчлүүлэхийн тулд заавал урьдчилан захиалга өгөх шаардлагатай ба оройн зоог барих үнэ хамгийн багадаа 275 ам.доллараас эхлэх гэнэ.

Харин бүтикийн дөрөвдүгээр давхарт Le Café V хэмээх кофе, коктейл, хөнгөн зуушаар үйлчлэх кафе нээгдсэн нь илүү энгийн даруу байдлаар зоог барихыг хүссэн зочдод илүү тохиромжтой юм.