Энэ шинэ жилээр ямар будалт хийх вэ?: Мэргэжлийн артистууд зөвлөж байна
Оросын нүүр хувиргагчид өвөрмөц будалтууд санал болгож байна
АЛИСА КАЗАКОВ
Би шинэ жилийн баярын үдэш тав тухтай байхыг эрхэмлэдэг. Түүнчлэн баярт бэлдэж байгаа гэх нэрийдлээр олон цагийг нүүр будалтдаа зарцуулах дургүй. Учир нь хэрэгжүүлэхэд хялбар нүүр будалт ч гэсэн үр дүнтэй, сайхан харагдаж болдог юм. Жишээ нь, миний санал болгох будалт бол хийж байх явцдаа ямар ч үе шат дээр нь зогссон ялгаагүй сайхан харагддаг давуу талтай.
Хийх аргачлал
1. Сормуус хоорондын хэсгийг хар өнгийн харандаагаар будаж, нүдний эргэн тойронд өө дарагч түрхэн судас болон нөсөө толбоо далдална.
2. Дээд зовхиндоо алтлаг өнгийн тень аль болох өргөн тавьж, ирмэгүүдийг нь багсаараа сайн уусгана.
3. Саагаа дээд болон доод зовхин дээрээ тавихдаа төв цэгээс нь эхлэн бусад хэсэгт тараах байдлаар будна. Дараа нь жижиг ширхэгтэй саагаа дээрээс нь давхарлах боломжтой.
4. Нарийн контураар нүдний төгсгөл болон урд хэсгийг будна.
5. Сормуусаа будна. Мөн дээрээс нь ширхэглэж наадаг хиймэл сормуус ашиглах боломжтой. Ингэхдээ цавууг чихний хөвөнгөөр болгоомжтой тавихыг зөвлөе.
Ашиглагдах бүтээгдэхүүнүүд
Тень- Water Eyeshadow, Kiko Milano
Саа- Sparkles Sand, Krygina Cosmetics
Крем- Face & Bode foundation, Dior Backstage, Dior
АНЯ КОЧЕРГИНА
Би шинэ жилийн нүүр будалтаа хийхдээ ямар нэг дүрэмд хязгаарлагддаггүй. Миний арга барил жил бүр л хувьсан өөрчлөгдөж байдаг. Тэр ч утгаараа будалтууд маань зарим үед даруухан хэв маягтай, саармаг, харин заримдаа гял цал болдог. Учир нь би нүүр будалтыг удаан тогтоцтой, бүрдүүлсэн төрхтэй зохицсон бөгөөд хүнийг өөртөө итгэлтэй болгодог байхад хангалттай гэж боддог.
Хийх аргачлал
1. Суурь кремээ түрхээд, хөмсгөө зориулалтын гелээр хэлбэржүүлнэ.
2. Суурин дээрээ гялалзсан пүдр түрхэж, хүйтэн туяатай хайлайтер тавина.
3. Дээд зовхио саарал тениэр будаж, хавтгай багсаар тараана.
4. Давхрааны дээд болон хөмсөгний доод хэсэгт саагаа түрхэнэ.
5. Өнгөгүй, гялалздаг өнгөлөгчөөр уруулаа өнгөлнө.
Ашиглагдах бүтээгдэхүүнүүд
Тень- Eyeshadow Perfect Shine, LIC
Хайлайтер- How many carats?!, Fenty Beauty
Зориулалтын цавуутай саа- Angel, Isidalibra
ЕЛИЗАВЕТА ЗЕЛЕНОВА
Энэ жилийн баярын арга хэмжээнүүд урьд урьдынхаасаа цомхон болно гэж таамаглаж байгаа ч, би хувьдаа шинэ жилийнхээ уур амьсгалыг алдахгүй байхыг төлөвлөж байна. Энэ удаагийн бүрдүүлсэн төрх маань гоёмсог бөгөөд хэрэгжүүлэхэд хялбар болсон байгаа.
Хийх аргачлал
1. Нүүрний крем, өө дарагч ашиглан хөнгөхөн бөгөөд гялалзсан суурь тавина.
2. Нүдний будгийн тогтцыг уртасгах үүднээс өө дарагчаа зовхин дээрээ түрхэнэ.
3. Дээд зовхио тоор жимсний улбар шар өнгийн тениэр будаж, урд хэсгийг нь хайлайтераар будна.
4. Улаан өнгийн контур ашиглан нүдээ будна. Ингэхдээ артист маань Krygina Cosmetics брэндийн хоёр төрлийн өнгийг хооронд нь хольж ашигласан байна. Түүнчлэн контурын оронд уруулын будаг ашиглах боломжтой бөгөөд жишээ нь, Jeffree Star-ын бүтээгдэхүүн нь зовхинд аюулгүй юм.
Ашиглагдах бүтээгдэхүүнүүд
Пигмент- Concrete Mandarin, Krygina Cosmetics
Бронзер-Хайлайтер Lost in Amalfi, Kiko Milano
Крем- The Healthe Foundation, Physician's Formula
МАРИЯ ГОНЧАРОВА
Гэрэл анивчсан шөнийн хот, бүрхэг тэнгэр болон тод галын дөл надад баяр баясгалан төрүүлдэг тул нүүр будалтын санаагаа би төвөггүй олсон. Ингэхдээ нүдний будалтыг энгийн бөгөөд үдэшлэгт тохирох талаас нь бодож хийсэн.
Хийх аргачлал
1. Шовх үзүүртэй хар өнгийн харандаагаар сормуус хоорондын хэсгийг будаж контураа зурна.
2. Нүдээ нээсэн чигт нь давхрааныхаа дээд хэсэгт зураг дээр харуулсан шиг нарийн зураасыг зурж, төгсгөлийг нь контуртайгаа холбоно. Харандаагаа чанга даралгүйгээр олон удаа давхарлаж өнгийг нь тодруулах илүү үр дүнтэй билээ.
3. Зурсан хүрээнийхээ дотор талыг гелэн суурьтай саагаар будаж, сормуусаа будна.
Ашиглагдах бүтээгдэхүүнүүд
Гелэн суурьтай саа- Queridos glitters
Харандаа- Zodiaque Saturne En Capricorne, Vivienne Sabo
Бидний зүгээс санал болгох бусад будалтууд
Наалт болон шигтгээ
Энгийн, өдөр тутмын будалт дээрээ гоёмсог стикер, шигтгээ наах төдийд л гоёлын нүүр будалт бий болдог. Ингэхдээ дээд зовхи, хамар, нүдний эхлэл хэсэг гээд дуртай газраа, өөрсдийн сонирхолдоо тааруулан төрхөө бүрдүүлээрэй.
Металлик смоки
Смоки будалт гэхээр л хар, бор өнгөөр будах нь ард хоцорчээ. Оронд нь хүйтэн туяатай гүн цэнхэр, нил ягаан гэх мэт өнгөнүүдээс сонгож шинэ жилийн өнгө аястай будалт хийгээрэй. Нүдний будгийг илүү тогтоц сайтай болгох үүднээс өө дарагч эсвэл праймер ашиглаж, харин тениэ нягтрал сайтайгаас нь сонгож, завсар гаргалгүй будахыг зөвлөе.
Маш их саа
Энэхүү будалтын амин сүнс нь оргилуун дарсны өнгөтэй саа юм. Тус будалтад нүүрний суурь чухал үүргийг гүйцэтгэх болно. Тодруулбал, хацар өнгөлөгчөөр хацрынхаа ясыг тодруулж, арьсныхаа өнгөтэй тохирсон крем ашиглан, бүдэг өнгийн будгаар уруулаа өнгөлөөрэй.
Holographic нүүр будалт
Яг л усан будгаар зурсан уран зураг шиг харагдах уг будалт нь хэрэгжүүлэхэд хамгийн хүндрэлтэй нь байх болов уу. Гэсэн ч бид үйл явцыг аль болох хөнгөвчлөх зөвлөгөөнүүдийг хүргэж байна. Нэгдүгээрт, энэ нь таны эхний оролдлого бол хоёроос дээш өнгө ашиглахгүй байхыг зөвлөе. Хоёрдугаарт, гэгээлэг өнгийн тень дээр тод өнгийн тень давхарлах зарчмыг баримтлаарай.
Цагаан өнгө
Минималист хэв маягийг эрхэмлэгчид цагаан өнгийн контурыг анхааралдаа аваарай. Ийм контураар дээд, доод зовхи, нүдний эхлэл, төгсгөл гээд бүхий л хэсэгт бүтээлч будалт хийж болох билээ.
