Алдарт The Mask киноны үргэлжлэл анги гарах уу?
Өдгөө 30 гаруй жилийн өмнө нээлтээ хийж байсан уран зөгнөлт, инээдмийн жанрын The Mask киног үзээгүй хүн ховор болов уу. Ижил нэрт комик зохиолоос сэдэвлэн бүтээсэн тус киноны гол дүрд жүжигчин Жим Керри болон Камерон Диаз нар тоглодог. Харин үйл явдалд дотогшоо зан чанартай, бага зэрэг бүтэлгүй Стэнли Ипкисс хэмээх залуу нэгэн хачирхалтай ногоон өнгийн баг олсноор ер бусын супер хүчтэй болж буй талаар харуулдаг билээ.
Тэгвэл тус киноны үргэлжлэл анги хийгдэж магадгүй гэх цуурхал олон нийтийн дунд дэгдээд эхэлжээ. Энэ тухай жүжигчин Жим Керри Sonic the Hedgehog 3 киноныхоо нээлтийн ёслолын үеэр ярьсан бөгөөд тэрээр "The Mask киноны үргэлжлэл ангийг хийнэ гэдэг бол үнэхээр гайхалтай санаа. Би өмнө нь кино урлагаас завсарлага авч, тэтгэвэртээ гармаар байна гэж ярьж байсан шүү дээ. Гэвч сайн киноны санал ирэхэд хүний бодол өөрчлөгддөг юм байна лээ" хэмээжээ. Харин жүжигчин Камерон Диаз "Хэрэв Жим тус бүтээлд дахин дүр бүтээнэ гэвэл би ч гэсэн тоглоно л гэсэн үг" гэж хариулсан байна.
Одоогоор тус киноны дараагийн анги гарах нь албан ёсоор батлагдаагүй байгаа хэдий ч гол дүрийн жүжигчдийн нааштай байдал нь үзэгчдийн сэтгэлд бяцхан найдварын оч асаагаад байгаа юм. Эргэн сануулахад, The Mask кино нь нээлтээ хийсэн даруйдаа Box Office жагсаалтыг тэргүүлж, нийтдээ 351 сая ам.долларын ашиг олж байсан билээ.
