Киану Ривз эргэн ирлээ: John Wick киноны тавдугаар анги хийгдэнэ

Лас Вегас хотод болж буй CinemaCon арга хэмжээний үеэр Lionsgate кино компанийн зүгээс John Wick киноны тавдугаар анги хийгдэхээр болсон тухай албан ёсоор мэдээлжээ. Шинэ ангид жүжигчин Киану Ривз эргэн Жон Викийн дүрийг бүтээхээр болсон бөгөөд өмнөх ангиудад ажиллаж байсан найруулагч Чад Стахельски, продюсер Базил Айваник, Эрика Ли нар дахин тус төсөл дээр ажиллахаар болсон байна.

Одоогоор шинэ ангийн нэр, цацагдах огноо, үйл явдал гэхчлэн чухал мэдээллүүд цацагдаагүй байгаа хэдий ч үзэгчид Жон Викийн түүх адал явдалт үргэлжлэхээр болсонд тун баяртай байгаа гэнэ. Мөн цувралын найруулагч Чад Стахельски ирээдүйд John Wick франчайзаас сэдэвлэсэн анимейшн бүтээхээр төлөвлөж буй талаараа хуваалцсан байна. Тус анимейшн дээр John Wick 1 кинон дээр гарсан үйл явдлаас өмнөх түүхийг харуулах аж. 

Түүнчлэн ирэх зургаадугаар сарын 6-ны өдөр John Wick франчайзын спин-офф From the World of John Wick: Ballerina бүтээл үзэгчдийн хүртээл болоход бэлэн болоод байгаа билээ. Тус кинонд жүжигчин Ана де Армас гол дүрийг бүтээсэн юм.