When Life Gives You Tangerines цувралын талаарх таны мэдэх ёстой зүйлс

Хэтийдсэн баян тансаг амьдрал, араар тавилт, эцэсгүй өшөө авалт, цуврал аллага гэх мэт Өмнөд Солонгос улсын туурвидаг түгээмэл зохиолтой цувралуудаас тэс өөр шинж, өнгө төрхтэй When Life Gives You Tangerines бүтээл саяхан Netflix-ээр цацагдаж дууссан билээ. Үзэгчдийн хүртээл болсон даруйдаа олон нийтээс төдийгүй кино шүүмжлэгчдээс өндөр сайшаал хүртээд буй тус цуврал нь Netflix-ийн англи хэл дээрх биш (Non-English) бүтээлүүдийг үзэлтээрээ тэргүүлээд байгаа юм.

Иймд уншигчдадаа зориулан When Life Gives You Tangerines цувралын талаарх сонирхолтой баримтуудыг хүргэхээр бэлтгэлээ. 

Нулимсаа арчих салфетикаа бэлдээрэй

Эгэл жирийн амьдралын тухай өгүүлэх мэт боловч анги бүр дээрээ үзэгчдийг уйлуулж, зүрхийг нь шимшрүүлж буй тус цувралын зохиолчоор When the Camellia Blooms, Fight for My Way зэрэг бүтээлүүдийн зохиолыг туурвисан Им Сан Чүн ажилласан байна. Тус цуврал нь бидний амьдралд орших олон жижиг зүйлсийн үнэ цэнийг ойлгуулж, давхар нийгмийн асуудлууд, гэр бүлийн харилцаа, соёлын өөрчлөлтүүдийг сонирхолтой байдлаар тусгаж өгчээ. Мөн эрдэм мэдлэг өвөрлөх хүслээр жигүүрлэгдсэн бүсгүйчүүд гурван үеэрээ тэмцсэний эцэст сая нэг боловсрол эзэмшиж, ажил хөдөлмөр эрхлэх чөлөөт сонголтын өмнө ирж буй талаарх чухал сэдвийг хөндсөн гэдгээрээ онцлог юм.

Цувралын үйл явдал 1950-аад оны Чежү арал дээр өрнөх бөгөөд яруу найрагч болох хүсэлтэй Э Сүн болон усан сэлэлтийн тамирчин болох авьяастай Ян Гван Шиг хэмээх залуусын гэнэн хонгор хайр дурлал, цаашлаад тэдний хайраас дэлбээлсэн үр хүүхдүүдийнх нь тухай эгэл жирийн амьдралыг энгийн атлаа гайхалтайгаар өгүүлэх болно. Мөн тус цуврал нь анги бүр дээрээ таныг инээлгэж, мөн тэр хэрээрээ уйлуулах учир нулимсаа арчих салфетикаа бэлдээрэй хэмээн зөвлөе. 

Жүжигчдийн удаан хугацааны дараах эргэн ирэлт

Э Сүн болон Гим Ёны дүрийг бүтээсэн дуучин, жүжигчин IU нь 2019 онд Hotel Del Luna хэмээх цувралд дүр бүтээснээсээ хойш жүжигчний мэргэжлээ түр хойш нь тавьж, дуучны карьертаа илүү анхаарч байсан билээ. Ийнхүү зургаан жилийн турш телевизийн цувралд дүр бүтээгээгүй тэрээр When Life Gives You Tangerines бүтээлд тоглож, үзэгчдээс чамгүй сайшаал хүртээд байгаа юм. Үүнээс өмнө IU-д Netflix-ийн Queen of Tears цувралд дүр бүтээх санал ирсэн боловч тэрээр татгалзаж, оронд нь When Life Gives You Tangerines цувралд тоглох саналыг хүлээж авч байсан юм. Мөн IU энэхүү цувралын анги бүрээс 350 сая воны (828 сая төгрөг) цалин авсан бөгөөд ингэснээр тэрээр Өмнөд Солонгос улсын хамгийн өндөр үнэлгээтэй эмэгтэй жүжигчин болсон байна. 

Харин бүсгүйчүүдийн мөрөөдлийн залуу гэгдээд буй Ян Гван Шигийн дүрд тоглосон жүжигчин Паг Бу Гом нь 2020 онд Record of the Youth цувралд дүр бүтээснийхээ дараа цэргийн албанд татагдсан билээ. Ийнхүү Бу Гом цэргийн албаа амжилттай хааж дуусах үетэй зэрэгцэн 2023 онд түүнийг When Life Gives You Tangerines цувралд тоглохоор болсон тухай мэдээлэл цацагдаж, олон нийтийн дунд өндөр хүлээлт үүсгээд амжсан юм. Тэрээр Ян Гван Шигийн дүрийг бүтээхийн тулд 5 кг гаруй жин нэмсэн бөгөөд давхар Чежү арлын аялгаар ярьж сурсан гэнэ. Ийнхүү Паг Бу Гомын хичээл зүтгэл ч талаар болоогүй бөгөөд үзэгчид Ян Гван Шигийн дүрийг түүний бүтээсэн хамгийн шилдэг дүрүүдийн нэг хэмээн тодорхойлоод байгаа юм. 

60 тэрбум воны өртгөөр бүтсэн

Энэхүү цуврал нь нийтдээ 60 тэрбум воны (142 тэрбум төгрөг) өртгөөр бүтсэн бөгөөд зураг авалтыг түлхүү Чежү арал болон Андун хотод хийжээ. Энэ талаар цувралын найруулагч Ким Вон Сог "Энэхүү цувралын маань үйл явдал 1950 оны сүүлээс эхлээд одоо цаг хүртэл буюу 2025 он хүртэл үргэлжилдэг. Иймд киноны сцен бүрийг тухайн цаг үеийнх нь хэв маяг, өнгө аястай зохицуулж хийх гэж их хичээсэн" хэмээжээ. 

Зураг авалтад зориулж шинээр тосгон барьж байв

Цувралын гол үйл явдал өрнөдөг далайн эргийн хажуу дахь тосгоныг үзэгчид маань санаж байгаа болов уу. Тэгвэл кино багынхны зүгээс цувралыг илүү бодитой харагдуулах үүднээс Чежү арал дээр шинээр тосгон бүтээн байгуулсан гэнэ. Ингэхдээ тэд 1950-аад оны орчныг төгс дүрслэхүйц 80 гаруй сүрлэн дээвэртэй байшин барьж, загас агнуурын худалдааны захыг босгожээ.

Бодит түүхээс сэдэвлэсэн үү?

Энэхүү цуврал нь жинхэнэ амьдрал дээрх бодит хосын түүхээс сэдэвлэгдээгүй боловч 1950-аад оноос өдийг хүртэлх цаг үеийн нийгэм, соёл, хүмүүсийн ерөнхий байдал зэрэг амьдралын бодит нөхцөл байдал дээр суурилан хийгдсэн бүтээл юм. 

Сэтгэл хөдөлгөм OST-ууд

Хөгжим гэдэг аливаа уран бүтээлийг амь оруулж, сэтгэл хөдлөлийг дээд цэгт нь хүргэж өгч чаддаг чухал ач холбогдолтой зүйл билээ. Харин When Life Gives You Tangerines цувралын дуунууд нь киноны сцен бүрд таарсан хэмнэлтэйн зэрэгцээ зарим хэсэг дээр нь тухайн цаг үед тренд болж байсан сонирхолтой дуунуудыг шингээж өгсөн байв. Жишээлбэл 2003 оны үйл явдал гарч буй хэсэг дээр дуучин И Хё Ригийн 10cm дуу эгшиглэсэн нь үзэгчдийн сэтгэлд багагүй хүрээд амжсан гэнэ шүү. 

Ингээд When Life Gives You Tangerines цувралын дуунуудыг хамтдаа сонсоцгооё.