Шинэ жилийн уур амьсгал оруулж, сэтгэл дулаацуулах 6 кино
Цас хаялж, шинэ жилийн баяр дөхсөн энэ өдрүүдэд хүн бүр гацуур модоо засаж, хайртай дотнын хүмүүстээ бэлэг бэлдэж, хуучин оноо дүгнэн баяр хөөрөөр дүүрэн байдаг билээ. Тэгвэл энэ үед баяр дээр баяр нэмж, шинэ жилийн уур амьсгал оруулахад тохиромжтой романтик, инээдмийн, аль эсвэл зүгээр л сэтгэлд дулаан мэдрэмж төрүүлэх шинэхэн кинонуудыг танилцуулъя.
“Red One”
Сантаг аврах ажиллагааны тухай өгүүлдэг энэхүү инээдмийн, адал явдалт кино арваннэгдүгээр сарын 6-ны өдөр нээлтээ хийжээ. Тус киноны гол дүрд Крис Эванс, Дуэйн Жонсон нар тоглосон. Зул сарын өмнө Сантаг үл мэдэх этгээд хулгайлж, баяр сүйрэхдээ тулаад байгаа учир түүнийг яаралтай олохын тулд Хойд туйлын аюулгүй байдлын дарга Калум Дрифт (Дуэйн Жонсон), мэргэжлийн анчин Жек О’Мелли (Крис Эванс) нар бүхий л хүч чадлаа нэгтгэснээр киноны үйл явдал өрнөнө.
“The Snow Sister”
Netflix-ийн бүтээсэн тус кино арваннэгдүгээр сарын 29-ний өдөр нээлтээ хийсэн ба зохиолч Майя Лундегийн хүүхдийн үлгэрээс сэдэвлэгджээ. Кинонд уй гашуу, баяр хөөр, хүндрэл бэрхшээл гээд амьдралд тохиолддог бүхий л зүйлсийг нэг дор хөндөн харуулдаг. Харин үйл явдалд зул сарын баярын өмнөхөн төрсөн эгчийгээ алддаг Жулиан хүүгийн түүхийг өгүүлнэ.
“Hot Frosty”
Мөн л Netflix-ээс үзэх боломжтой энэхүү романтик инээдмийн кинонд бэлэвсэн Кэти бүсгүйн тухай өгүүлнэ. Кэтид санаандгүй шидэт ороолт бэлгэлснээр киноны үйл явдал эхлэх бөгөөд тухайн ороолтоороо тэрээр цасан хүнийг амь оруулдаг. Харин тэрхүү цасан хүн нь төгс эрэгтэй хүн болж хувирахыг хэн ч төсөөлсөнгүй.
“Christmas on Call”
Дулаан уур амьсгалтай, сэтгэл хөдөлгөм зул сарын түүх дэлгэцнээ арваннэгдүгээр сарын 22-нд гарч эхэлжээ. Филадельфи мужид нүүж ирээд удаагүй байгаа залуухан түргэн тусламжийн эмч Ханна Майклс хүнд хэцүү, цаг наргүй ажилтайгаа дасан зохицох гэж бүх чадлаараа хичээнэ. Түүнтэй хамт ажилладаг Уэс Салливан мөн адил хүнд нөхцөлд ажилладаг учир тэд бие биеэ маш сайн ойлгож, цагийг хамт өнгөрүүлж эхэлдэг. Гэвч удалгүй Ханна Уэсийг түүнээс ямар нэгэн зүйл нууж байгааг гадарлаж эхлэх бөгөөд тэрхүү нууц нь тэдний харилцааг төдийгүй Ханнагийн бүх зүйлийг өөрчилж болзошгүй байдалд хүргэнэ.
“Meet me next Christmas”
Netflix платформ дээр байршсан уг киноны үйл явдал Нью-Йорк хотод өрнөнө. Киноны гол дүр болох Лейла бүсгүйн зул сарын хамгийн том хүсэл бол мөрөөдлийн залуугаа олох явдал юм. Тэрээр мөрөөдлийн залуутайгаа түний дуртай “Пентатоникс” хамтлагийн тоглолт дээр учирна хэмээн боддог. Гэвч тэрхүү шинэ жилийн тоглолтын тасалбар аль хэдийн дууссан байх бөгөөд Лейла тасалбарын эрэлд гарч Нью-Йоркийг бүтэн тойрох хэрэг гарна.
“Our Little Secret”
“Our Little Secret” кино арваннэгдүгээр сарын 27-ны өдрөөс эхлэн Netflix платформ дээр гарч эхэлжээ. Киноны гол дүрийн бүсгүй болох Эйверигийн дүрд Линдси Лохан, Логаны дүрд Йен Хардинг нар тоглосон юм. Эйвери, Логан нар багаасаа хамт өсөж, сайн найзууд болж улмаар бие биедээ дурладаг. Гэвч Эйвери Лондонд ажиллах урилга хүлээн авснаар тэдний зам хоёр тийш болно. Тэд бүтэн арван жилийн дараа эргэн уулзаж буй тухай киноны үйл явдал харуулдаг.
