Coachella 2025 наадамд оролцох уран бүтээлчдийн нэрс зарлагдлаа
Хойд Америкийн хамгийн том хөгжмийн наадам болох Coachella уламжлал ёсоор Калифорни мужийн Индио хотын Empire Polo Club-т 2025 оны дөрөвдүгээр сарын 11-13, 18-20 өдрүүдэд зохион байгуулагдахаар товлогджээ.
Ирэх жилийн headliner буюу голлох уран бүтээлчдээр Lady Gaga, Трэвис Скотт, Post Malone болон рок хөгжмийн хамтлаг Green Day нар оролцохоор болсон байна. Цаашлаад Megan Thee Stallion, Charli XCX, Анитта, Клайро, Тайла тэргүүтэй сонсогчдын сайн мэдэх алдартнууд болон бусад олон хамтлаг, дуучид наадмын бүрэлдэхүүнд багтсан бөгөөд мөн BLACKPINK хамтлагийн Jennie болон Lisa нар соло уран бүтээлчийн хувиар анх удаа Coachella наадамд уран бүтээлээ толилуулахаар болжээ.
Сонирхуулахад, рэппер Трэвис Скотт 2020 онд Coachella наадмын голлох уран бүтээлчдийн нэгээр сонгогдож байсан ч цар тахлын улмаас наадам бүхэлдээ цуцлагдаж, үзүүлбэрээ үзүүлж чадаагүй түүхтэй. Мөн 2022 онд тэрээр дахин сонгогдсон ч түүний Astroworld Festival тоглолтынх нь үеэр болсон эмгэнэлт явдлын улмаас наадамд оролцох боломжгүй болсон билээ. Иймд удаан хугацааны дараа Coachella-гийн тайзан дээр гарах гэж буй Трэвис Скоттын үзүүлбэр түүний шүтэн бишрэгчид төдийгүй хөгжим сонирхогчдын дунд өндөр хүлээлт үүсгээд байгаа гэнэ.
Наадмын тасалбар энэ баасан гарагаас эхлэн борлуулагдаж эхлэх ба өмнөх жилүүдийн адил фестиваль Youtube-р шууд дамжуулалт хийгдэн, цацагдах юм.
