Кендалл Женнер Маурицио Кателланы алдарт бүтээлийг дахин амилууллаа
Garage сэтгүүлийн зураг авалтад зориулан
Модель Кендалл Женнер Garage арт сэтгүүлийн шинэ дугаарын нүүрийг чимсэн байна. Тэрээр энэхүү зураг авалтдаа зориулан орчин үеийн уран бүтээлч Маурицио Кателланы хэд, хэдэн бүтээлийг дахин амилуулжээ. Тухайлбал тэрээр Маурицио Кателланы алдарт "Trophy Wife" (Олзны эхнэр) гэх супер модель Стефани Сеймурын уран баримлыг дуурайсан харагдлаа.
Түүнчлэн загвар өмсөгч бүсгүй алдарт уран бүтээлчийн 54 дэх удаагийн Венецийн биенналд танилцуулж байсан тагтаатай бүтээл болон Art Basel Miami-д зориулсан хананд наасан гадил жимстэй инсталляцыг дахин бүтээсэн байна.
Сонирхуулахад Interview сэтгүүлийн эзэн Питер Брант өөрийн эхнэр супер модель Стефани Сеймурын уран баримлыг 2003 онд Маурицио Кателланаар бүтээлгэж байсан түүхтэй. Каттелан 2002 онд Брантын гэрт зочлохдоо Стефани Сеймурийг бизнесмений "Олзны эхнэр" хэмээн хошигнож байсан гэдэг. Тиймээс ч уран барималч топ моделийн баримлыг хананд өлгөдөг бугын толгойг санагдуулам, маш өвөрмөц байдлаар урлажээ. Үүнээс хойш энэхүү баримлыг хүмүүс тоглоом, шоглоомоор "Олзны эхнэр" гэж нэрлэдэг болсон юм.
