Алессандро Микеле ажлаа хүлээлгэн өгсний дараах Gucci брэндийн анхны цуглуулга

Дизайнер Алессандро Микеле Gucci загварын ордны бүтээлч захирлын албан тушаалаа орхих болсон харамсалтай мэдээ өнгөрөгч оны арваннэгдүгээр сард цацагдсан билээ. Тэрхүү явдлаас хойш хоёр сар гараны дараа Gucci брэнд нь Микелегийн оролцоогүй анхны эрэгтэй цуглуулгаа Миланы загварын долоо хоногийн хүрээнд толилууллаа. Gucci-гийн удирдлагуудын зүгээс шинэ бүтээлч захирал томилоогүй бөгөөд намар-өвөл 2023 цуглуулга дээр эрэгтэй загварын баг ажилласан байна.

Шинэ цуглуулга нь импровизац буюу урьдчилж бэлдэлгүйгээр тухайн цаг мөчдөө аливаа зүйл туурвих ойлголтыг дэлгэрүүлэхээр зорьжээ. Тэр ч утгаараа загварын шоун дээр тоглосон Marc Ribot’s Ceramic Dog хамтлаг нь импровизац дор зохиосон аянуудаа танхимд эгшиглүүлсэн юм.

Алессандро Микелегийн гял цал, аливааг туршиж, энгийн зүйлийг чамин болгох арга барилтай харьцуулахад намар-өвөл 2023 цуглуулгад цагаан майк, өргөн брюкэн өмд зэрэг сонгодог хувцаснууд зонхилжээ. Аксесуарын хувьд торгон алчуур энэ цуглуулгын гол дүр нь байсан бөгөөд үүнийг тэд цүнхнээс зангидаж, жийнсэн өмдний жижиг хэсэгт нөхөөс болгон оруулсан байв. Түүнчлэн эндээс та алдарт Jackie цүнхний томруулсан хувилбарыг олж харах боломжтой.

Энэхүү шоуг үзэхээр “Wednesday” цувралын жүжигчин Перси Хайнс Уайт, EXO хамтлагийн Kai, Жереми О. Харрис, Идрис Эльба болон бусад алдартнууд хүрэлцэн иржээ.