Vetements, хавар-зун 2023: Хүйсгүй загвар үргэлжилсээр

Vetements брэндийн бүтээлч захирал Гурам Гвасалиа гурав дах бие даасан цуглуулгаа бичлэгээр дамжуулан танилцууллаа. Зураг авалт Швейцар улсын Цюрихийн нисэх буудлын ойролцоох барилга дотор болсон бөгөөд дотроосоо яг л хэдэн зуун настай сүмийг модерн хэв маягт уусган тохижуулсан мэт харагдана. “Жинхэнэ дүр төрхөөрөө, өөрийнхөөрөө байдаг хүн бүрд үүд хаалга нь нээлттэй ирээдүйн сүм дотор бид зогсож байна” хэмээн Гвасалиа загварын шоу болсон газрын талаар хэлсэн юм. Бүтээлч захирал хавар-зун 2023 цуглуулгаараа жендэрийн эрх тэгш байдлын асуудлыг хөндөж, өөрийгөө таньж мэдэн, итгэл үнэмшлийнхээ төлөө бат зогсохыг уриалсан байна.

Дизайнер Гвасалиа бэлхүүс ил гаргасан богино топ, пиджак болон бомбер зэргийг эргэлт буцалтгүй эрчүүдийн хувцасны шүүгээний нэг хэсэг болсныг шинэ цуглуулгаараа дахин нэг удаа батлан харууллаа. Мөн тэрээр өөрийн таних тэмдэг болсон хэтрүүлэгтэй том гэмээр силуэтийг гаргахаа мартсангүй. Ингэхдээ Гвасалиа эсгүүр, материал болон хийц дээрээ анхаарахаас гадна яг ижил загварын тренч цув, хантааз, бомбер хүрмийг нэг дор давхарлах аргаар хувцасны хэлбэр дээр тоглолт хийжээ. Түүнчлэн гуя хүрсэн түрийтэй гутлыг богино шоорттой хослуулсан зоригтой шийдлийг толилууллаа.